चस्वाँद्व त्वालय् बय् पुइगु कासा
येँ (सन्ध्या टाइम्स)/चस्वाँद्व मानन्धर सनागु खलःया ग्वसालय् बय् पुइगु धेंधेंबल्ला कासा जुल। त्वाः थाकुलि अष्टनारायण मानन्धरया सभापतित्वय् जूगु उगु ज्याझ्वलय् त्वाःया दाफा गुरु त्रिरत्न मानन्धरं धेंधेंबल्लाः बारे कनादीगु खः ।
ज्याझ्वलय् बय् पुइगु स्यनादीम्ह धर्म मुनिकारं थज्याःगु धेंधेंबल्लाः यानाः न्यंकेमाःगु खँय् बः बियादिल। कासाया निर्णायक कथं लाय्कूसाः त्वाःया गुरु बुद्धमान मानन्धर, अमृत मानन्धर व थँहिति त्वाःया गुरु बद्रिनारायण मानन्धरपिं च्वनादीगु खः ।
ग्वसाः खलकं धाः कथं ७ गते कुन्हु जुइगु बुसादँया लसाताय् स्वयम्भुइ जुइगु ज्याझ्वलय् थुकिया सिरपाः लःल्हायेगु ज्या जुइ। ज्याझ्वलय् छ्यांज्ये रत्ननारायण न्हूजवाः साय्मिं लसकुस यानादीगु खः ।
