लुम्बिनीइ न्हूगु परित्राण मण्डप लःल्हात

येँ (सन्ध्या टाइम्स)/नेपाल राष्ट्रिय ज्ञानमाला समितिया ग्वसालय् वंगु शनिवाः नव जागरण अभियान न्ह्याकल। समितिया नायः प्रा. सुवर्ण शाक्यया सभापतित्वय् न्ह्याःगु उगु ज्याझ्वलय् भिक्षु मैत्रीं शिल प्रार्थना यानाः उलेज्या यानाबिज्याःगु खः। उगु ज्याझ्वलय् समितिया महासचिव अमीरमान शाक्यं नवजागरण अभियानया उद्देश्य बारे कनादीगु खः ।

बुद्ध जन्मभूमि लुम्बिनीइ जूगु उगु ज्याझ्वलय् भिक्षु मैत्रीं लुम्बिनीया प्रगतिया विषयय् कनाबिज्याःगु खःसा ज्याझ्वः न्ह्यानाच्वंगु इलय् लुम्बिनीया पुरातत्व प्रमुख बसन्त विदारीलगायत थीथी व्यक्तित्वपिंसं बोधिमत च्याकादीगु खः। पोखराया ज्ञानमाला भजन खलःपाखें भजन न्यंकेगु ज्या जूगु उगु ज्याझ्वलय् मंकाः बुद्धपूजा नं जूगु खः ।

अथे हे आइतवाः कुन्हु श्रद्धालु दातापिनिपाखें मुंगु दामं न्हूगु "परित्राण मण्डप" तयाः येँ, यल, ख्वप लगायत लुम्बिनी च्वंगु थीथी विहारया भन्ते, लामा, अनागारिकापिनि उपस्थितिइ भिक्षु महासंघया भिक्षुपिंसं भयमुक्त जुयाः शान्तिया लागि कामनायासें न्हिछियंकं परित्राण पाठ याःगु खः। ज्याझ्वलय् भिक्षु महासंघया जेष्ठ महास्थवीर भिक्षु अश्वघोषं लुम्बिनी विकासया लागि झीसं थज्याःगु कुतः यानावं च्वनेमाःगु खँ कनाबिज्यात। परित्राण मण्डपया पाठ क्वचाये धुंकाः समितिया अध्यक्ष शाक्यं परित्राण मण्डप अन्तर्राष्ट्रिय बौद्ध समाज लुम्बिनीया अध्यक्ष भिक्षु मैत्रीयात लःल्हानादिल। ज्याझ्वलय् लःल्हाःगु उगु परित्राण मण्डप लुम्बिनीइ महापरित्राण याइपिं सकसितं नियमानुसार उपलब्ध जुइगु जानकारी नं बिउगु दु। थीथी लागां वःपिं स्वसःम्ह भक्तजनपिंसं ब्वति काःगु उगु ज्याझ्वलय् समितिया प्रमुख सल्लाहकार शान्तरत्न शाक्यं लसकुस यानादीगु खःसा समितिया वरिष्ठ उपाध्यक्ष किरण कुमार जोशीं सुभाय् न्वचु बियादीगु खः ।