नीन्हय्म्ह श्रामणेरयात प्रव्रज्या

ख्वप (सन्ध्या टाइम्स)/मुनि विहार दायक परिषदया ग्वसालय् मुनि विहारय् छक्वलं नीन्हय्म्ह कूलपुत्रपिंत श्रामणेर प्रब्रज्या याकूगु दु। उप संघनायक भिक्षु अश्वघोष महास्थविरया उपाध्यायकत्वय् उगु श्रामणेर प्रब्रज्या जूगु खः। नेपाःया संघ महानायक भिक्षु बुद्धघोष महास्थविर ९० दँ क्यंगु लसताय् मुनि विहारं ग्वसाः ग्वःगु मंकाः श्रामणेर प्रब्रज्याय् झिंस्वंगू जिल्लाया नीन्हय्म्ह कुलपुत्रपिं दुथ्याःगु खः ।

अन आः तक न्यासःम्ह श्रामणेर प्रब्रज्या जुइधुंकूगु व उकी मध्ये छवाःनिसें लत्या तक अन च्वनीपिं दुगु खँ भिक्षु विपश्वीं कनाबिज्यात। अन श्रामणेर जूपिं मध्ये योग्यता गाःपिंत थाइल्याण्ड छ्वयेगु व्यवस्था यानातःगु दु। गुलिं श्रामणेरपिं आः हे स्थायी रुपं थाइल्याण्डय् बौद्ध शिक्षा अध्ययन यानाच्वंगु दु। हाल मुनि विहारय् तामाङ, थारु, मगर, गुरुङ, नेवाः नापं खय् ब्रम्हू समुदायया ६१ म्हेसिनं श्रामणेर जुयाः अनौपचारिक बौद्ध शिक्षा व औपचारिक शिक्षा कयाच्वंगु दु ।