झलनाथं यानाः माओवादी नं अन्यौलय्
प्रधानमन्त्री झलनाथ खनालं थःगु पार्टी दुने ब्वलंगु आन्तरिक विवाद ज्यंके मफुगु कारणं यानाः वय्कःयात प्रधानमन्त्री जुइत दकलय् तःधंगु ग्वाहालि याःगु पार्टी एनेकपा (माओवादीं) आःयात थःपिं मन्त्रिपरिषद् मच्वनेगु धकाः निर्णय याःगु दु। लिसें माओवादी मन्त्रिपरिषदय् मवइगु जूगुलिं प्रम खनालं नियुक्त याःपिं स्वम्ह मन्त्रीतय्गु मन्त्रालय विभाजन यायेगु ज्या नं जुइ फयाच्वंगु मदु। वय्कः थौंकन्हय् छुं हे ज्या बिया मतःपिं मन्त्रीतय् मन्त्रिमण्डल ज्वनाः सरकार न्ह्याकेमाःगु अजूचायापुगु अवस्थाय् थ्यनाच्वंगु दु। लिसें थ्व इलय् वय्कःयात छखे थःगु हे पार्टी दुनें मन्त्रालय बाँडफाँड व ७ बुँदे सहमतियात कयाः दवाव वयाच्वंगु दुसा मेखे सहयोगी पार्टी माओवादीपाखें नं याकनं थःपिंलिसे जूगु सहमति कार्यान्वयन या धकाः दवाव बिया हयाच्वंगु दु। थुकिं यानाः प्रधानमन्त्री खनाल दथुइ कानाच्वंगु प्रस्ट जू। तर वय्कलं थुकिया बारे छुं निर्णय बी मफुगु कारणं यानाः देशय् सरकार वयां नं ज्या धाःसा जुइ फयाच्वंगु मदु ।
लिसें थुकिं यानाः माओवादीयात नं व याये थ्व याये मदुगु अवस्थाय् लाका बिउगु दु। पार्टी दुने उम्मेदवारी त्वःते मते धायेक धायेक हे अध्यक्ष प्रचण्डं आकाझाकां एमाले अध्यक्ष झलनाथ खनालयात समर्थन यानाः प्रधानमन्त्री दयेका बिल। तर प्रधानमन्त्री जुइधुंकाः खनालं यायेमाःगु ज्या धाःसा याना मबिउगु कारणं माओवादी नं 'आः छु याये' धइगु अवस्थाय् लाः वंगु दु ।
सरकार थःपिनिगु हे खःसां थःपिंसं हे छुं याये मफइगु अवस्थाय् लाः वंगु कारणं आः माओवादी दुने नं थुकिं यानाः मेगु कथंया कचवं पिकया बीगु स्थिति ब्वलनेफु ।
