राष्ट्रियता, अग्रगमन व नागरिक सर्वोच्चता रक्षार्थया पक्षय् छप्पँ जुइत पत्रकारतय् इनाप
पत्रकारतय्सं राष्ट्रियता व नागरिक सर्वोच्चताया पक्षय् छधी छप्पँ जुइत सकसित इनाप याःगु दु । जनसाचार अभियानं म्हिगः येँय् ग्वसाः ग्वःगु छगू साक्षात्कार ज्याझ्वलय् वय्कःपिंसं राष्ट्रियता अग्रगमन व नागरिक सर्वोच्चताया रक्षार्थ पत्रकारतय्सं च्वसा न्ह्याकेमाःगु खँ कुलादीगु दु ।
ज्याझ्वलय् प्रेस काउन्सिलया नायः नारायण शर्मां पत्रकारतय्सं जनतायात सार्वभौम दयेकेगु ढङ्गं च्वसा न्ह्याकूसा जक संविधान निर्माण व शान्ति प्रकृया निष्कर्षय् थ्यनीगु बिचाः तयादीगु दु । पत्रकारत जनताया सर्वोच्चताया पक्षय् जुइमाःगु धयादिसें शर्मां गुलिखय् साचार माध्यमतपाखें अराजक व अशान्तिया पक्षपोषण जुइकथं बिषयबस्तु प्रकाशन प्रशारण जूगु धासें च्यूताः प्वंकादीगु दु । अथेहे ज्याझ्वलय् क्रान्तिकारी पत्रकार संघया नायः महेश्वर दाहालं सामन्ती संरचना व यथास्थितिवादयात कायम यायेत स्वःगु ज्ञानेन्द्र शाहं नं थें हे राष्ट्रपति डाक्टर रामबरण यादवं नं उगु हे पलाःयात निरन्तरता ब्यूगुिलं पत्रकारतय्सं अग्रगमनया पक्षय् च्वसा न्ह्याकेमाःगु खँ न्ह्यथनादीगु दु ।
नागरिक सर्वोच्चता अग्रगमन व राष्ट्रियताया रक्षा यायेमाःगु दायित्वपाखें पत्रकारत ताःपायेमफुगु वय्कःया धापू दु । मूल्याङ्कन मासिकया सम्पादक हरिगोविन्द लुइँटेलं जनआन्दोलनया उपलब्धित संस्थागत जुइमफयाच्वंगु इलय् सरकारं अवकाश बिइधुंकूम्ह छम्ह कर्मचारीयात राष्ट्रपितं पदय् हे बहाल जुइत निर्देशन बियाः नागरिक सर्बोच्चताया उपहास याःगु धयादीगु दु । नेपाल पत्रकार महासंघया दाँभरि रमेश बिष्टं राष्ट्रपति प्रधानमन्त्रि व प्रधानसेनापति न्ह्याम्हेसिया पलाः जूसां जननिर्बाचित संसदया निर्णय बिना जूसा नागरिक सर्वोच्चता विपरित जुइगु धयादीगु दु ।
