न्हय्गू बुँदाया मर्म कथं न्ह्यावने : प्रधानमन्त्री खनाल

प्रधानमन्त्री झलनाथ खनालं माओवादी व एमाले दथुइ जूगु न्हय्गू बुँदे सहमतिया मूल मर्म कथं हे थः न्ह्यावनीगु खँ धयादीगु दु ।

प्रेस चौतारीं प्रधानमन्त्रीया सम्मानय् आइतवाः येँय् याःगु छगू ज्याझ्वलय् न्ववानादिसें प्रधानमन्त्री खनालं थः न्हय्गू बुँदे सहमतिलय् प्रतिबद्ध दुगु धासें उगु हे सहमति कथं न्ह्याः वनेगु प्रतिबद्धता नं प्वंकादिल ।

फुक्कं पार्टीनाप सहलह यानाः सहमतिया आधारय् न्यूनतम मंकाः ज्याझ्वः हयाः थुगु सरकार न्ह्यावनीगु धयादिसें प्रधानमन्त्री खनालं वर्तमान सरकारय् ब्वति कायेत कांग्रेस लगायत दलतय्त इनाप यानदिल ।