नेपाल-ओली न्हय्गू बुँदे सहमतिया विपक्षय्
नेकपा (एमाले) सम्बन्धित युवा संगठन व वाम बुद्धिजीवितय्सं माओवादी व एमाले नायः दथुइ जूगु न्हय्गू बुँदे सहमति कार्यान्वयन यायेत दबाव ब्यूगु कन्हय् कुन्हु हे एमाले वरिष्ठ नेतात माधवकुमार नेपाल व केपी शर्मा ओलीं उकिया विरुद्ध बिस्कं भेला याःगु दु ।
थौं एमाले मू ज्याकू बल्खुइ च्वंगु भेलां न्हय्गू बुँदे सहमति पार्टीया नीति व सिद्धान्त विपरित जूगु धासें छुं नं हालतं उगु सहमति कार्यान्वयन यायेमबीगु निर्णय याःगु दु । स्वीम्ह स्वयां अप्व केन्द्रीय दुजःतय् उपस्थिति दुगु भेलां सहमति परिमार्जन मयायेकं कार्यान्वयन यायेमज्यूगु धाःगु दु । सहमति कार्यान्वयन यायेमबीत पार्टी नेतृत्व नापं प्रधानमन्त्री झलनाथ खनालयात दबाव बीगु निर्णय नं भेलां याःगु दु ।
न्हय्गू बुँदे सहमति कथं माओवादीयात गृह मन्त्रालय बीगु बुखँ सार्वजनिक जुयाच्वंगु इलय् जूगु उगु भेलां माओवादीयात गृह व रक्षा नापं सुरक्षा सम्बन्धी छुं नं मन्त्रालय बीमज्यूगु धाःगु दु ।
