अध्यादेश अनुमोदन यायेत माओवादी सहमत

एकीकृत नेकपा (माओवादी) न्हूगु बजेट हयेगु शर्तय् अध्यायदेश अनुमोदन यायेत सहमत जूगु दु ।

प्रधानमन्त्री झलनाथ खनाल व माओवादी नायः पुष्पकमल दाहल 'प्रचण्ड' दथुइ आइतवाः सुथय् जूगु खँल्हाबंलाय् अध्यादेश अनुमोदन यायेगु सहमति जुइवं सोमवाः च्वनीगु व्यवस्थापिका संसदया मुँज्याय् माओवादी प्रतिस्थापन विधेयकया पक्षय् च्वनीगु जूगु दु ।

प्रधानमन्त्री निवास बालुवाटरय् निम्ह नेतात दथुइ जूगु सहलह लिपा माओवादी स्थायी समिति दुजः देव गुरुङं न्हूगु सरकार गठन जुइधुंकूगुलिं पुलांगु सरकारं हथाय्सं हःगु बजेटयात निरन्तरता बीमफइगु बारे सहलह जूगु धयादिल ।

सहलहसं मन्त्रिपरिषद विस्तारया बारे नं सहलह जूगु खःसां उकिया बारे धाःसा छुं सहमति जुइमफुत ।