विद्यार्थीतय् ग्याङ फाइटय् छम्ह विद्यार्थी सित
वीरगंज (सन्ध्या टाइम्स)/ल्याय्म्हतय् निगू पुचः दथुइ थौं सुथय् जूगु ल्वापुइ लानाः कलेज वनाच्वंम्ह छम्ह विद्यार्थी सीगु दु। उकी लानाः नेशनल एकेडेमीया १२ तगिमय् ब्वनीम्ह १७ दँ या प्रवीण कुमार सिंह सीगु खः। छ्यनय् बांमलाक घाः जुयाः यक्व हि बाः वनाः सिंहया मृत्यु जूगु खँ चिकित्सकतय्सं धाःगु दु ।
थौं सुथय् ६ बजे कलेज वंम्ह सिंह व वया छम्ह पासायात अनया पानीट्यांकी चोकय् खुम्ह मेपिं विद्यार्थीतय्सं आक्रमण याःगु खः। उमि दथुइ जूगु सामान्य विवाद तच्वयाः ल्वापु जुइवं सिंहया छ्यनय् रडं दाःगु खः। उघिमय् हे सिंह क्वःदलसा आक्रमणकारीत बिसिउँ वन। घटनाय् ल्हाः दुगु आशंकाय् प्रहरीं सिद्धार्थ इन्टरनेशनल कलेजया विक्की गुप्तायात ज्वंगु दु। गुप्तायात क्लासय् ब्वनाच्वंगु हे अवस्थाय् ज्वंगु खः। लनय् हि किनाच्वंगुलिं वयात ज्वंगु खः। उखे हत्याया विरोधय् कलेजया विद्यार्थीतय्सं प्रदर्शन नं शुरु याःगु दु। हत्यारायात कारवाही यायेमाःगु माग यासें एकेडेमीया विद्यार्थीतय्सं कलेज तकं बन्द यानाः जिल्ला प्रहरी ज्याकू घेराउ याःगु दु ।
