देगलय् दइपिं द्यःत प्रहरी चौकीइ

ख्वप (सन्ध्या टाइम्स)/थौंकन्हय् थन अप्वयाच्वंगु द्यः खुइगु झ्वलय् अथे खुया यंकूगु आपालं द्यःत धाःसा प्रहरी चौकीइ थ्यनाच्वंगु खँ सीदुगु दु। छवाः न्ह्यः वडा २ माहेश्वरीइ च्वंगु कलात्मक रामसीताया ल्वहंया द्यः तंगु खः। उम्ह द्यः छगः हे ल्वहँतय् कियाः दयेका तःगु कारणं तसकं झ्यातुयाः खुँतय्सं यंके मफयेवं माहेश्वरी लागां दक्षिणपाखे ख्वँह्रय् खुसिइ बोराय् स्वथनाः वांछ्वयातःगु अवस्थाय् स्थानीय मनूतय्सं खंकूगु खः। लिपा प्रहरीयात खबर यायेवं उम्ह द्यः अनं यंकाः महानगरीय प्रहरी बृत्त जगातिइ तयातःगु दु। छगूत्या फिट ब्या व निगू फिट जाः दुगु उगु ल्वहँया मूर्ति तंगुयां छवाः लिपा शौच याःवंपिं मनूतय्सं खंकाः प्रहरीयात खबर बिउगु खःसा वयां लिपा उगु मूर्ति चौकीइ हयातयागु खँ जगाति प्रहरी चौकीया प्रमुख केशवकुमार थेवें कनादीगु दु। अथेहे थुसाचाय् खुइत थिनाः लिकया तयेधुंकूगु लक्ष्मीनारायणया मूर्ति नं स्थानीय जनतां सुरक्षा बी मफुगु कारणं प्रहरीं हे यंकातःगु दु। थुकथं ख्वपया गुलिखे कलात्मक मूर्तित थौंकन्हय् देगलय् सिबें नं प्रहरी चौकीइ लानाच्वंगु दु ।