सरकार क्वःथलेत स्वत धाःसा कांग्रेसं बचे याइ
येँ (सन्ध्या टाइम्स)/वर्तमान सरकार क्वःथलेगु निंतिं माओवादीं कुतः यात धाःसा उकियात बचे यायेगु ज्या नेपाली कांग्रेसं याइगु नेता भिष्मराज आङदम्बें धयादीगु दु। थन जूगु छगू ज्याझ्वलय् नवासें नेता आङदम्बें वर्तमान सरकार दयेकूगु माओवादी हे सरकार क्वःथलेगु ज्याय् लगे जुइ धुंकूगु धासें वय्कलं सरकार क्वःदीगु अवस्थाय् शान्ति व संविधानया निंतिं जूसां जिम्मेवार पार्टीया भूमिका थःपिंसं म्हिताः उपयुक्त निर्णय यायेगु जुइ धयादिल ।
एमाले व माओवादी दथुइ जूगु न्हय्गू बुँदाया सहमतिं देय्यात आघात लाकूगु दावी यासें वय्कलं थुकिं सहमतिया लँपुयात अझ गम्भिर लिच्वः लाकूगु नं धयादीगु दु। शान्ति व संविधान निर्माणया ज्या सहज रुपं वनाच्वंगु इलय् निगू दल दथुइ जूगु न्हय्गू बुँया सहमतिं देय्यात अराजक व सत्ता कब्जया लँपुइ यंकुगु दु वय्कलं धयादीगु दु। थुकिं यानाः छगू गम्भिर आशंका नं ब्वलंगु नं वय्कलं धयादीगु दु ।
पालंपाः प्रधानमन्त्री जुइगु, सेना समायोजन व विषयं देय्यात अन्यौलतापाखे घ्वाना यंकेगु ज्या जूगुलिं निषेधया राजनीतियात तिबः बीगु ज्या जूगु नं वय्कलं धयादीगु दु। थुकिया लिच्वः कथं ऐतिहासिक उपलब्धियात लिउने लाकेगु ज्या जूगु नं आङदम्बें धयादीगु दु ।
उगु हे ज्याझ्वलय् राष्ट्रिय जनशक्ति पार्टीया सहअध्यक्ष प्रकाशचन्द्र लोहनीं न्हय्गू बुँदाया सम्झौतायात षडयन्त्रया संज्ञा बिसें सहमति शान्ति प्रक्रिया व संविधान निर्माणया भावना अःखः जूगु दावी यानादिल ।
