गृह मन्त्रालय व सत्ता कब्जाया हौवा

न्हूगु गठित मन्त्रिपरिषद् गृह मन्त्रालय सुनां कायेगु धकाः जुयाच्वंगु विवादया दथुइ अनेक कथंया न्हून्हूगु खँत नं पिहां वयाच्वंगु सीदत। खास यानाः यदि गृह माओवादीं काल धाःसा सुरक्षाया सम्पूर्ण निकाय हे उमिगु ल्हातय् वनाः उमिसं विद्रोहपाखें सत्ता कब्जा यायेफु धइगु विश्लेषण नं छगू थासं वयाच्वंगु व वहे मानसिकतां यानाः माओवादीयात गृह बी फइ मखु धकाः धया हयाच्वंगु खनेदु ।

खतुं थुकथंया विश्लेषण याना जुइगु स्वतन्त्रता सकसितं दु तर उकियात पुष्टि याइगु छुं ठोस आधार मदयेक सुयातं द्वपं जक बिया जुइगु धाःसा पाय्छि मखु। थौं थ्व इलय् तक वयेधुंकूपिं माओवादीतय्सं आः हानं विद्रोहपाखें सत्ता कब्जा याइगु सम्भावना गुलि दु, उकिया बारे बिचाः यायेमाःगु आवश्यकता दु। माओवादीं विद्रोहपाखें सत्ता कब्जा यायेगु बिचाः यानाच्वंगु दु लाकि मदु, अले या हे याःसां उगु कुतः सफल जुइ लाकि मजुइ, व नं विश्लेषणया विषय जुइफु। गृह मन्त्रालयया बारे आः माओवादीया सवालय् जक मखु न्हापा एमाले व कांग्रेसया दथुइ नं विवाद जूगु हे खः। उकिं गृहया विवाद थ्वपाखें काये फइगु थीथी कथंया लबःया लोभं यानाः सिर्जना जूगु खः धकाः अःपुक अनुमान यायेफु। तर उकियात त्वपुइगु लागिं माओवादीं सत्ता कब्जा यायेफु धइगु मनोगत विश्लेषण न्ह्यःने तया जुइगु छुं नं कथं पाय्छि मखु। लिसें आः थौंया इलय् अज्याःगु मानसिकता ज्वनाच्वनेगु खःसा उकिं देय्यात नं न्ह्यःने न्ह्याकी मखु, थ्व खँय् नं बिचाः यायेमाः। छगू पदया खँयात कयाः न्ह्याः वनेत्यंगु मुलुकयात ठप्प याना तयेगु सुयां नं लागिं बुद्धिमानी जुइ मखु ।