राष्ट्रपतिविरुद्ध प्रदर्शन
राष्ट्रपतिया असंवैधानिक पलाःविरुद्ध निषेधित क्षेत्र त्वाःथसें राष्ट्रपति भवन न्ह्यःने धर्ना बिइत थ्यंपिं मिसातय्त प्रहरीं पंगः थंगु दु । पुर्व घोषित ज्याझ्वःकथं म्हिगः राष्ट्रपति भवन शीतल निवासय् धर्नाबिइत थ्यंपिं सभासद् व क्रान्तिकारी मिसातदथुइ प्रहरीं याःगु हस्तक्षेपया कारण दर्जनौ मिसात घाःपाः जूगु खः ।
शान्तिपूर्ण धर्नाय् प्रहरीं अन्धाधुन्ध लाठीचार्ज यानाः सभासद्त लिला भण्डारी तारा घर्तिमगर कल्पना धमला ओनसरी घर्ति गोमा पाठक सीता पौडेल आङदावा शेर्पा व क्रान्ति थापा बेनुका कार्की लगायतया दर्जनौ मिसात घाःपा जूगु अखिल नेपाल महिला संघ क्रान्तिकारीं जानकारी ब्यूगु दु । घाःपाः जूपिं मध्ये क्रान्ति थापा व बेनुका कार्कीयात शिक्षण अस्पताल महाराजगाजय् वासः यायेगु नितिं भर्ना याःगु खःसा अथेहे राजतन्त्रया अन्त्यलिपा पलिस्था जूगु लोकतन्त्रय् शान्तिपूर्ण धर्नादथुइ नीति निर्माण यायेगु सभासद् व लोकतन्त्रया पक्षय् न्ह्यःज्यानाच्वंपिं मिसातदथुइ निर्ममतापूर्वक लाठीचार्ज यानाः याःगु दमनया अखिल नेपाल महिला संघ क्रान्तिकारीं म्हिगः छगू प्रेश विज्ञप्ती पिकयाः उकिया विरोध याःगु खः ।
राष्ट्रपतिया असंवैधानिक पलाःया विरोधय् एकीकृत नेकपा माओवादीया भातृ संगठनतय्सं म्हिगः नं देय्न्यंकलं प्रदर्शन याःगु दु । म्हीग सनिलय् स्वनिगःया स्वंगुलिं जिल्लाय् माओवादी नेवाः राज्य समितिया कुतलय् म्हिगः नं प्रदर्शन याःगु दुसा मेखे अखिल क्रान्तिकारीं असंबैधानिक कु खारेजीया माग यासें राष्ट्रपति डाक्टर रामबरण यादवयात सार्बजनिक बहिष्कार यायेगु घोषणा याःगु दु ।
