लिम्बुवानय् बजाः व शिक्षण संस्था नं बन्द
येँ (सन्ध्या टाइम्स)/अनिश्चितकालिन यातायात बन्द यानाः संघर्षय् कुहां वयाच्वंगु लिम्वुवान राज्य परिषदं थनिंनिसें बजाः नं अनिश्चितकाल तकया निंतिं बन्द याःगु दु। परिषदं थःपिनि लागाय् मतदाता नां धलः दयेकेगु ज्या दिकेत माग याना वयाच्वंगु दु ।
प्रहरीं ज्वनाः कुनातःपिं थःपिनि कार्यकर्तातय्त तत्काल त्वःतेमाःगु माग यासें आन्दोलनय् कुहां वयाच्वंपिं लिम्बुवान कार्यकर्तातय्सं थौं सुथंनिसें हे सतकय् प्रदर्शन यानाः बजाः बन्दया आह्वान याःगु खः। म्हिगः बुधवाःनिसें उमिसं शिक्षण संस्था बन्द आह्वान याःगु खः ।
बन्द आह्वान यानाः प्रदर्शन याःपिं न्हय्म्ह कार्यकर्तातय्त बुधवाः प्रहरीं ज्वंगु दु। परिषद्या केन्द्रीय दुजःपिं अशोक चेम्जोङ, वीरबहादुर घिसिङ, पृतम फागो, कलाकार परिषद्या केन्द्रीय उपाध्यक्ष सोनाबाबा सुब्बा, मोरङया सचिव डिकबहादुर साँवा, जिल्ला दुजः भविन्द्र नाल्बो व गाउँ सदस्य सोभङसिंह कुरुङयात ज्वनाः कुनातःगु दु ।
लिम्बुवानया कार्यकर्तातय्सं मंगलवाःनिसें अनिश्चितकाल तकया निंतिं यातायात बन्द आह्वान याःगु खःसा म्हिगः बुधवाःनिसें शिक्षण संस्था नं अनिश्चितकाल तकया नितिं बन्द याःगुलिं अनया जनजीवन झन हे प्रभावित जूगु दु ।
परिषद्या महासचिव खगेन्द्र माखेमं 'सन्ध्या टाइम्स'लिसे खँल्हासें थःपिंसं थनिनिसें अझ अप्वः सशक्त कथं प्रदर्शन यानागु खँ कनादिल। आः थःपिनि माग पूरा मजुल धाःसा अनिश्चितकालिन आम हड्तालय् कुहां वनेमालीगु खँ नं भाजु माखेमं कनादिल ।
