निवानिं बैना लित कायेगु पहल मयात
येँ (सन्ध्या टाइम्स)/नेपाल वायुसेवा निगमं एअरबस न्यायेगु लागिं फ्रान्सया कम्पनीयात बिउगु बैना दां लित बीगु जुल धकाः एअरबसं पौ छ्वया हःसां नं निगमया वर्तमान अध्यक्ष केबी लिम्बुं ध्यबा लित कायेगुपाखे छुं हे पहल मयाःगु खँ सीदुगु दु ।
एअरबसं निगमया हे फ्याक्स नम्बर ४२३०८३४ व ४२२५३०८ य् पौ छ्वयाः ध्यबा लित बीगु बारे जानकारी बिउगु खः। तर केबी लिम्बुं थःत उकिया बारे जानकारी हे मदु धकाः ध्यबा लित कायेगु पहल मयाःगु खः।
एअरबसपाखें ध्यबा बी धालं नं पहल मयाःगु कारणं निगमया कर्मचारी युनियन (कांग्रेस) व कर्मचारी संघ (एमाले) पाखें लिम्बुयात म्हिगः छगू पौ बिसें ध्यबा लित कायेगुपाखे तुरुन्त माःगु कारवाही न्ह्याकि धकाः इनाप याःगु दु ।
सूत्रया कथं बैना वंगु ध्यबा लित वल धाःसा तत्कालिन कार्यकारी अध्यक्ष सुगतरत्न कंसाकार विरुद्ध लानाच्वंगु मुद्दा खारेज जुइ। मुद्दा खारेज जुल धाःसा कंसाकार हानं लिहां वइ व थःगु पद मदइ धकाः हे लिम्बुं ध्यबा लित कायेगुपाखे छुं हे पहल मयाःगु खः ।
