थःगु पार्टीं याःगु त्यागयात एमालें कमजोरी ताय्कल -: भट्टराई
एकीकृत नेकपा (माओवादी)या न्वकु डा. बाबुराम भट्टराईं प्रधानमन्त्रीया नितिं थःगु पार्टीं याःगु त्यागयात एमालें कमजोरी तायेकूगु खँ धयादीगु दु । संसदय् इमान्दारीपूर्वक भोट तयाः झलनाथ खनालयात प्रधानमन्त्रीइ निर्बाचित याःगु न्ह्यथनादिसें वय्कलं माओवादीया उदारतायात एमालें कमजोरी ताय्कूगुलिं सरकारय् ब्वति मकायेगु स्पष्ट यानादिल ।
गोर्खाया मिरकोट माध्यमिक विद्यालयया स्वर्ण महोत्सव समापन ज्याझ्वलय् न्वंवानादिसें डा. भट्टराईं मन्त्रीपरिषद्य् फुक्क दलयात कःघानाः यंकेगु सहमति जूसां नं उगु हे बुँदाय् एमालें त्व: माःगु धयादिल ।
सरकारय् ब्वति मकाःसां नं गुण व दोषया आधारय् समर्थन व विरोध यायेगु वय्कलं स्पष्ट यानादिल । समर्थन नापं लित काःसा कन्हय् लिच्वः छु जुइ धकाः बिचाः नापं यायेमफइगुलिं याकनं सरकार क्वःमथलेगु वय्कःया धापू खः । सरकारपिने च्वनाः शान्ति व संविधानयात लिच्वलय् थ्यंकेत दवाब बिइगु न्ह्यथनादिसें वय्कलं आः आन्दोलनपाखें जनताया माग व हिउपाःयात पलिस्था यायेगु धयादिल । अधिकार प्राप्तिया नितिं जनतायात आन्दोलित जुइत नं वय्कलं इनाप यानादिल ।
