माओवादीं झलनाथ नेतृत्वया सरकारय् ब्वति मकायेगु निर्णय
एकीकृत नेकपा (माओवादीं) झलनाथ नेतृत्वया सरकारय् ब्वति मकायेगु निर्णय याःगु दु ।
प्रधानमन्त्री निवास बालुवाटारय् जूगु निगू पार्टीया शीर्ष नेतातय्गु सहलहलय् प्रधानमन्त्री निर्वाचनया इलय् जूगु न्हय्गु बुँदे सहमति कार्यान्वयन मयाःगु धासें माओवादीं सरकारय् ब्वति मकायेगु निर्णय याःगु खः ।
सहलह लिपा माओवादी न्वकू नारायणकाजी श्रेष्ठं एमालें सरकार गठन न्ह्यः याःगु सहमति उल्लंघन याःगुलिं सरकारय् ब्वति मकायेगु निर्णय यानागु धयादिल । सरकारय् ब्वति मकाइगु जूसां माओवादीं सरकारयात ब्यूगु समर्थनयात धाःसा निरन्तरता बिइगु निर्णय नं याःगु दु । न्वकू श्रेष्ठं एमालें सहमति कार्यान्वयन विश्वस्त वातावरण तयार जुलधाःसा जक सरकार बारे बिचाः यायेफइगु धयादिल ।
प्रधानमन्त्री चुनाव न्हय्याः माओवादी नायः पुष्पकमल दाहाल व एमाले नायः नापं प्रधानमन्त्री झलनाथ खनाल दथुइ सरकार सञ्चालन बारे न्ह्यगु बुँदे गोप्य सम्झौता जूगु खः ।
सम्झौताय् सरकार साचालनप्रति प्रतिबद्ध जुयाः माओवादी लडाकु समायोजनया ब्यागलं फोर्स दयेकेगु, एमाले व माओवादीं पालंपाः सरकार साचालन यायेगु नापं बुँदात दु । सम्झौताय् गृहमन्त्रालय माओवादीयात बिइगु सहमति जूगु नं नेतातय्सं धयावयाच्वंगु दु । तर प्रधानमन्त्री जूगु कन्हय् कुन्हू हे एमाले स्थायी कमिटिं गृहमन्त्रालय थःपिन्सं हे कायेगु निर्णय यायेवं निगू दल दथुइ कचवं ब्वलंगु खः ।
मन्त्रालय बांडफांडय् सहमति मजूगुलिं हे माओवादीं सरकारय् ब्वति कायेगु वा मकायेगु धैगु निर्णय यायेमफुगु खः । माओवादीं गृह, परराष्ट्र व सञ्चार थःपिंत दयेमाःगु धयावयाच्वंगु खःसा एमालें गृह बाहेकया मन्त्रालय बिइत थःपिं तयार दुगु धयावयाच्वंगु दु ।
