झलनाथं नं परम्परा त्वाःथलीगु, न्हापांगु भ्रमण कम्बोडिया
प्रधानमन्त्री जुइधुंकाः न्हापांगु खुसिइ भारत भ्रमणय् वनेगु परम्परायात प्रधानमन्त्री झलनाथ खनालं नं त्वाःथलीगु संकेत क्यंगु दु । वय्कःया न्हापांगु भ्रमण कम्बोडिया जुइगु आपालं सम्भावना दु । नेकपा (एमाले)या म्हुतु पौ बुधबार वाःपौसं छापय् जूगु वय्कःया खँल्हाबल्हाय् खनालया न्हापांगु भ्रमण कम्बोडिया जुइफूगु च्वयातःगु खः ।
'परिस्थिति व संयोगं नं छु देशय् न्हापांगु खुसिइ वनेमाः धइगु खँ निर्धारित जुइ । जिगु न्हापांगु यात्रा धाःसा सम्भवतः एशिया स्वयाः पिने जुइमखु व एशियाया हे छु नं देय् सम्भवतः कम्बोडिया जिगु न्हापांगु भ्रमणया देय् जुइ,' प्रधानमन्त्री खनालं खँल्हाबल्हाय् धयातःगु खः ।
अन्तर्राष्ट्रिय राजनीतिक दलतय्गु सम्मेलन (आइक्यापं) कम्बोडियाय् शान्ति सम्बन्धी नेपाः, कम्बोडिया व आइक्यापया दथुइ अन्तरक्रिया ज्याझ्वः ग्वसाः ग्वःगु दु । उगु ज्याझ्वलय् ब्वति कायेत वय्कःयात ब्वनापौ वःगु दु ।
थ्व स्वयाः न्ह्यः तत्कालीन प्रधानमन्त्री लिसे एकीकृत नेकपा (माओवादी)या नायः पुष्पकमल दाहाल 'प्रचण्डं' न्हापांगु खुसिइ भारत भ्रमणय् वनेगु परम्परा त्वाःथलाः चीन झायादीगु खः ।
