मन्त्रालय बाँडफाँट क्वःछीगु भालाः शीर्ष नेतातय्त
एकीकृत नेकपा (माओवादी) व नेकपा (एमाले)या नेतात दुथ्याःगु कार्यदलं मन्त्रालय बाँडफाँटया जिम्मा शीर्ष नेतातय्त ब्यूगु दु ।
प्रधानमन्त्रीया सरकारी निवास बालुवाटारय् थौं च्वंगु निगू दलीय कार्यदलया बैठकय् सहमति जुइमफयेवं मन्त्रालय बाँडफाँटया जिम्मा शीर्ष नेतातय्त ब्यूगु खः । कार्यदलय् माओवादीया दुजः लिसे न्वकु नारायणकाजी श्रेष्ठ 'प्रकाशं' मन्त्रालय बाँडफाँट क्वःछीत शीर्ष नेतातय्त ब्यूगु जानकारी बियादिल ।
कार्यदलया बैठकय् माओवादीलिसे जूगु न्हय्गू बुँदे सहमति पूर्ण कार्यान्वयन यायेत एमालें सहमति क्यंगुलिं न्हय्गू बुँदे सहमतिया विवाद अन्त्य जूगु प्रकाशं धयादिल । माओवादी व एमालें झिंगुंगू मन्त्रालय बाँडफाँट यानाः ल्यं दुगु न्हय्गू मन्त्रालय मेमेगु दलतय्त बिइगु सहमति जूगु माओवादी प्रवक्ता दीनानाथ शर्मां जानकारी बियादिल ।
बैठकय् एमाले नेतातय्सं विवादयात लिपा समाधान यायेगुकथं मन्त्रीपरिषद बिस्तार यायेमाःगु धाःसां नं माओवादीं न्हापां फुक्क विवाद क्वःछीमाःगु अडान तःगु खः । थ्व स्वयाः न्ह्यः सरकार नीस्वने न्ह्यः माओवादी नायः प्रचण्ड व एमाले नायः झलनाथ खनाल दथुइ जूगु न्हय्गू बुँदे सहमति कार्यान्वयनय् एमाले दुने विवाद जुइवं प्रधानमन्त्री ल्यःगु खुन्हु बिइधुंकाः नं मन्त्रीपरिषद विस्तार जुइफूगु मदुनि ।
