माओवादीयात मन्त्री सिबें सम्झौताया चिउताः
येँ (सन्ध्या टाइम्स)/प्रधानमन्त्री नियुक्त जूगु न्यान्हु लिपा नं भाजु झलनाथ खनालं मन्त्रिमण्डल दयेके मफुगु कारणं सरकारया आयुयात कयाः नं थीथी कथंया शंकात पिहां वःगु दु ।
एमालें गृहय् थः मनूयात नियुक्त यायेवं माओवादीं विरोध याःगु दुसा आः उकियात त्वःताः रक्षा व सञ्चार जकसां कायेगु खः लाकि धकाः बिचाः याना हःगु खँ सूत्रं धाःगु दु ।
न्हापा झलनाथ खनाललिसे जूगु सहमतिइ माओवादीयात 'रक्षा, गृह' मन्त्रालय बी धकाः किटान हे यानातःगु कारणं माओवादीं कम से कम थःगु अडानय् च्वनादिसँ धकाः प्रधानमन्त्री खनालयात धायेगु याना हःगु खँ सीदुगु दु।
लिसें निम्ह नेताया दथुइ जूगु सहमति कथं सरकारया नेतृत्व पालंपाः यायेगु खँ दुगुलिं कन्हय् प्रचण्ड प्रधानमन्त्री जुइगु इलय् आः एमालेया ल्हातय् लानाच्वंगु महत्वपूर्ण मन्त्रालयत फुक्कं माओवादीयात बीगु शर्तय् आःयात गृह त्वःतेफुगु खँ नं पिहां वःगु दु ।
अथे खःसां थौंकन्हय् माओवादीया चिउताः मन्त्रालय सिबें नं निम्ह नेताया दथुइ जूगु ७ बुँदे सहमति पालना याइगु खः लाकि मखु धइगु खँय् वनाच्वंगु खँ नं सूत्रं धाःगु दु। न्हय्गू बुँदे सहमतियात पालना याये मखु धकाः एमाले दुने विवाद जुयाच्वंगु कारणं माओवादीं उकियात ध्यान बियाः स्वयाच्वंगु खँ धाःगु दु ।
ल थ्वहे झ्वलय् उखे प्रधानमन्त्री झलनाथ खनालं थःगु प्रमुख स्वकीय सचिवय् दिपकचन्द्र अमात्य, विदेश सल्लाहकारय् मिलनराज तुलाधर व प्रेस सल्लाहकारय् सूर्य थापायात नियुक्त याइगु सम्भावना दुगु खँ सूत्रं धाःगु दु ।
