तनहुँलय् एमाले युवा संघया निगू समिति
येँ (सन्ध्या टाइम्स)/तनहुँ जिल्लाय् एमाले पार्टी अध्यक्ष झलनाथ खनाल पक्षधर व नेता केपी ओली पक्षधर निगू बिस्कं बिस्कं हे युवा संघ पिहां वःगु दु ।
थुकी छगू पक्षया नेतृत्व खनाल पक्षधर ऋषि भुषालं यानाच्वंगु दुसा मेगु पक्षया नेतृत्व ओली पक्षया बाबुराम अधिकारीं यानाच्वंगु दु। जिल्लाय् निगू युवा संघ दुगुलिं छुं दिं न्ह्यवंनिसें अन निरन्तर रुपं ल्वापु जूगु नापं छगू पक्षं मेगु पक्षयात ल्हाःवायेगु तकं याना वयाच्वंगु दु ।
थःगु हे पार्टी दुने म्वाः मदुगु व्यवहार यानाः नेतातय्त हे ल्हाः वाःगु द्वपनय् एमालेया युवा संगठन नेपाल युवा संघ तनहुँया अध्यक्ष ऋषि भुषालयात साधारण दुजःपाखें हे निलम्बन यानाः बिउगु दु। थःत निलम्बन याःगुलिं भुषाल समर्थित ल्याय्म्हतय्सं एमालेया जिल्ला सचिव विद्यानाथ ढकालयात पार्टी ज्याकू दुने हे दाःगु खः। पार्टी दुने अनुशासन व मर्यादाया पालना मयाःगुलिं कारवाही कथं भुषालयात निलम्बन यायेमाःगु खँ एमालेया जिल्ला अध्यक्ष केदार सिग्देलं धाःगु दु ।
