छत्रपाटी चिकित्सालयया बुन्हि
येँ (सन्ध्या टाइम्स)/येँ १७ वडास्थित छत्रपाटी निःशुल्क चिकित्सालयया ५४ क्वःगु बुदिंया लसताय् आइतवाः निःशुल्क स्वास्थ्य शिविरजुल। चिकित्सालयया अध्यक्ष विजय बहादुर मालीया सभापतित्वय् उगु ज्याझ्वः न्ह्याःगु खः ।
२०१३ साल माघ २३ गते क्षेत्रपाटीया उत्साही समाजसेवी ल्याय्म्हतय्गु कुतलं पलिस्था जूगु खः। ध्यबा मदयाः सामान्य उपचार तकं याये मफयाः सुयां नं अकालय् मृत्यु मजुइमा धकाः झितका ध्यबां स्थापना जूगु थुगु चिकित्सालय आः देय्या हे छगू नमुना सामुदायिक अस्पताल जुइधुंकूगु खँ अध्यक्ष मालीं कनादिल।ज्याझ्वलय् संस्थाया जीवित संस्थापक मध्येयापिं बद्रिनारायण मानन्धर व हरिनारायण महर्जनं चिकित्सालयया थप सेवा आकस्मिक सेवा व अन्तरंग सेवाया शुभारम्भ यासें सकसितं सुभाय् बियादिल। उगु ज्याझ्वलय् संस्थाया उपाध्यक्ष शंकर राज जोशी, डा. मनोज भट्टराई व डा. विजय बहादुर राजभण्डारीं नं नुगःखँ तयादीगु खः ।
