कांग्रेसय् निम्ह नेताया निगू हे बिचाः
येँ (सन्ध्या टाइम्स)/थःपिनिगु पाः हे गबलें मवइ कथं माओवादी व एमाले जानाः पालंपाः सरकार न्ह्याकेगु धकाः एमाले अध्यक्ष झलनाथ खनाल व माओवादी अध्यक्ष प्रचण्ड दथुइ जूगु गोप्य सम्झौताया विरोधय् थःपिं कुहां वयेगु धकाः कांग्रेसं निर्णय याःगु दु। माओवादी लडाकुत फुक्कं छथाय् तयाः छगू हे सैनिक युनिट दयेकेगु धकाः जुयाच्वंगु सहमतियात थःपिंसं गुगुं हालतय् नं स्वीकार मयायेगु खँ नं कांग्रेसं धाःगु दु ।
मेखे वहे कांग्रेसया वरिष्ठ नेता व पुलांम्ह प्रधानमन्त्री शेरबहादुर देउवां धाःसा प्रचण्ड व झलनाथया नेतृत्वय् आः कायम जूगु गठबन्धनयात कायम हे याना तयेमाः धयादीगु दु। म्हिगः नेपाल होटल व्यवसायी संघया छगू ज्याझ्वलय् न्ववासें वय्कलं एमाले व माओवादीया थ्व गठबन्धन कायम हे याना तयेमाःगु दु धासें नेपाली कांग्रेसं प्रतिपक्षय् च्वनाः सरकारयात ग्वाहालि याइगु बिचाः नं प्वंकादिल। भाजु देउवायात छखे लाकाः हे संसदीय दलया नेता रामचन्द्र पौडेलयात हानं प्रम पदया उम्मेदवार दयेकूगु खः ।
