माओवादी पोलिटव्यूरो वैठक स्थगित
वंगु कार्तिकय् क्वचाःगु खरिपाटि भेलां पारित याःगु कार्यनितिकथं भावी योजना क्वःछुइत च्वंगु एकिकृत नेकपा माओवादी पोलिटव्यूरोया बैठक कन्हय् हाकनं च्वनेगुकथं स्थगित जूगु दु । म्हिगः च्वंगु ख्वपया बोडेस्थित कृषि तालिम केन्द्रय् च्वंगु बैठकय् पीन्याम्ह पोलिटव्यूरो दुजःत मध्ये िझंखुम्हसिनं थःगु बिचाः तयादीगु खः ।
नायः प्रचण्डं बैठकय् दकले न्हापां हे बर्तमान समसामयिक विषयसं मौखिक प्रस्ताव तयेधुंकाः सचिबालय दुजःतय्सं थःगु बिचाः तयादीगु पार्टी प्रवक्ता दिनानाथ शर्मां जानकारी बियादीगु खः । नायः प्रचण्डं राष्ट्रिय कार्यकर्ता भेलां पारित याःगु कार्यनीतियात वर्तमान राजनैतिक परिस्थितिइ व्यवहारय् गुकथं कार्यान्बयन यायेगु धइगुबारे थःगु प्रस्ताब तयादीगु खःसा प्रस्ताबय् आःया जटिल राजनैतिक अवस्थाया निकास व सरकारपाखें राजीनामा बिइधुंकाः पार्टीया भूमिकाया विषय कःघाःगु खः । कार्यनितियात लागू यायेगु प्रकि्रया गज्याःगु जुइ धइगुबारे धाःसा छुं प्रष्ट याःगु मदु । सचिबालय दुजःतय्सं सरकारय् ब्वति दुगु पार्टीया भूमिकाया समिक्षा यायेगुया लिसलिसे आः गुकथं न्ह्यःने न्ह्यायेगु धइगु विषयसं थःगु बिचाः तयादीगु खः । कार्तिकय् क्वचाःगु ख्वपया खरिपाटी भेलां जनताया लोकतान्त्रिक राष्ट्रिय गणतन्त्रया कार्यनीति पारित याःगु खः । आलंकारिक राष्ट्रपितं दलतय्गु उक्साहट व विदेशी शक्ति केन्द्रया दबाबय् द्वैध सत्ता पलिस्था यायेधुंकाः माओवादी सरकारपाखें पिहाँवःगु खः ।
