लण्डनय् इहि मुंके
येँ (सन्ध्या टाइम्स)/बेलायतय् च्वनाच्वंपिं नेवाःतय् संस्था पासा पुचः गुथि युकेपाखें आः थः मस्तय् इहि व कय्तापुजा नं नेवाः विधिपाखें याकेगु पहल न्ह्याकूगु दु। थ्व झ्वलय् थुगुसी लण्डनय् नेवाः मिसा मस्तय्त इहि नं याकेगु तयारी यानागु खँ धाःगु दु। लण्डनय् नेवाः मिसा मस्तय् इहि मुंकेत्यंगु थ्वहे न्हापांगु घटना खः धकाः उकिया महासचिव सुभाष कायस्थं कनादीगु दु ।
वय्कलं कनादी कथं थ्व इहि मुनेज्या फयांफछि नेवाः द्यःब्रम्हूपाखें हे याकेगु ग्वसाः दु। उकिया लागिं बेलायतन्यंकं हे पुजा याइपिं द्यः ब्रम्हू मालेगु ज्या शुरु जूगु दु। छुं जुयाः द्यः ब्रम्हू मलुल धाःसा खय् ब्रम्हूपाखें जूसां थुगुसी इहि सम्पन्न यायेगु ताः तयातःगु दु ।
