आग्रह

नर्मदेश्वर प्रधान

खँयाखँय्
टेन्सन। तनाव। थौंकन्हय्। हरेक मनूया म्हुतुं टेन्सन खँग्वः पिहां वइ। पढ, अनपढया खँ मखु। टेन्सन छु। हर मनूतसें सिउ। मनूतसें टेन्सन जूगु खँ ल्हाइ। मन तयां तये मजिउ। नुगः खुल्ल मिनाच्वन। च्वंच्वं थे च्वने मफु। थज्याःगु खँ यक्वसिया म्हुतुं पिहां वइ। थ्व टेन्सनया अभिव्यक्ति खः। कारण पाइ। टेन्सनया अनुभूति सकसिकें दइ। मदुपिं सुं दइ मखु। थौं। जीवन म्हिगः थें सरल मजू। इच्छा-आकांक्षातय् घेरा तचाना बी। पूर्ति यायेगु स्रोतसाधनं न्ह्याये दइ मखु। धैर्य तनी। नुगः प्वःची फइ मखु। खलबल जुइ। अभाव। देखासिखी। पूर्तिया लँपुत। प्वाक-प्वाक। गाः गाः वनी। पलाः न्ह्याके मास्ति वइ। ब्वां वने इच्छा जुइ। प्राप्तिया लँ सुगम जुइ मखु। पलाःत गालय् स्वतुं वनी। थुन्नां थुन्नां चुइ। दइ। अय्नं मृगतृष्णां हय् हय् काः वइ। मन ची फइ मखु। अप्राप्ति। असन्तोष। अपूर्णताया सघन अन्धकारं नुगः त्वपुइ। नुगः तनावं ग्रस्त जुइ। टेन्सनं लिनाच्वनी ।

टेन्सन अर्थात् तनाव। थुकिं गय् मुक्त जुइगु? तनाव थौं तःधंगु ल्वय् जुइ। आमसमस्या। दुपिंत नं तनाब। मदुपिंत नं तनाब। थौंया जीवन स्वयम तनाबग्रस्त जुइ। मनुखं विकासया खँ ल्हाइ। विकास जुइमाः। सः थ्वक्क हाली। तर विडम्बना ! थौं स्वयम विकास तनावया कारण जुया बी। शहरीकरण विकासया मानक धाइ। गां अविकसित खंकी। दयनीय तायेकी। तर थौं वास्तविकता अथे मखु। अःखः जुइ। जीवन नगरक्षेत्रय् दुःखद् जुइ। तनावपूर्ण जुइ। थ्व स्वनिगः। महानगर। थन म्वानाच्वंपिंसं सिउ जीवन थन गुलि दुःखी। तनावपूर्ण। उपत्यकाबासीतय् जीवन थौं कुमिचां नःगु छेँ थें जुइ। पिने दुरुस्त छेँ। बांलाः। तर दुनें दुनें भ्वाभः। गुगुं इलय् नं पाःताः जुइफु थ्व। स्वनिगःया जीवन। भ्वाभःगु सिँ थें। गुकुन्हु खाग्राकखुग्रुक जुइ। भविष्यवाणी अःपुक यायेफु। ज्योतिष जुइम्वाः ।

तनावया नं वर्गीय चरित्र दइ। जनपक्षीय तनाव। पुँजीवादी तनाव। तःतखाःगु छेँ मदु। भिंभिंगु मोटर गये मखं। ऐश आराम मजुल। महत्वाकांक्षी तनावं ग्रस्तपिं नं दु। हितिं लः छप्ति हे मवः। कथु गय् प्याकेगु? गय् व्यवहार चले यायेगु? सर्वसाधारण जनतां फयेमाःगु तनाब जुइ। चिल्लो गाडीतय् सुगमताया लागि ट्राफिक नियम दयेकी। सामान्य जनता लँ पुलाः पारी वने माली। जेब्राक्रसया सुरक्षा दइ मखु। लँय् वारीं पारी वनेत जनतां ज्यान पायेमाः। तनावं ग्रस्त जुइ। पलाःपतिं भय, त्रास, पीर, असुरक्षा। जनता थौं सासः ल्हायेत नं तनाव तनावय् म्वायेमाली ।

तनावं मुक्ति गय् कायेगु ! थौं अनेक उपायत चर्चाय् वइ। ध्यान। योग। सिद्धबुद्धपिनि प्रवचन। आध्यात्मिक उपायया खँ हइ। मसाज, स्पा, स्पर्श उपचार यानादिसँ। तनावं स्वतन्त्र जुयादिसँ। विज्ञापन जुइ। उकुन्हु पत्रिकाय् खनी। छम्ह सदाबहार हिरोइनी। तस्बीरं संकेत याइ। व पूर्णनग्न। स्पा, मसाज केन्द्रय्। स्पा, स्पर्शउपचार विधिइ मग्न। द्वलंद्वः फुकी। तनावं मुक्ति काइ। तनावं मुक्तिया लागि धनीवर्गत विलासी केन्द्रय् चाःहिली।
स्वामी रामदेव। अनलोम विलोम। कपालभाती। स्वामीजी थौं व्यापक चर्चाय् वइ। रामदेव नेपालय् वइ। नेतात नं लिउ लिउ वनी। स्वस्थ गय् जुइगु? गुकथं तनावं मुक्त जुइगु? रामदेवं स्यनी। राम बाण उपचार बी। अथे हे मनूत विपश्यनाय् वनी। ध्यानय् च्वनी। तनावं मुक्त जुइत स्वइ। अनेक उपलब्धिया खँ हइ ।

स्वामी रामदेव ! छिगु अनुलोम, विलोमप्रति जिमि अनास्था मखु। शंका मदु। छिगु कपालभाती जिमिसं विश्वास याये। खः। छिं तुयूगु सँ हाकुके फु। तर थौं जिमिसं भोगे यानाच्वनागु ल्वय् मेगु हे दु। आधारभूत। जिमि त्वनेत लः मदु। कथु गं। शुष्क। लःया अभावय् सम्पूर्ण जनता गनाच्वंगु दु। थौं डिहाइड्रेसनं पीडित। जनता तृष्णां गना वनाच्वंगु दु। जिपिं लँजुवाः। जनता। लँय् वारीं पारी वनेत स्वये। असुरक्षित जुइ। जिमिगु लःया समस्या, वारीं पारी वनेगु सुरक्षा अनुलोम विलोमं निराकरण जुइ ला? कपालभातीं तुयूगु सँ हाकुइ फु। तर थुकिं जिमिगु हितिं लः वयेकी ला? जिमिसं कथु प्याके फइ ला? स्वामी रामदेवजु ! जिमिगु तनाबया हेतु छु खः? पहिचान यानादिसँ। जिमित छिगु प्रवचनं छुं समाधान जुइ फइला? छिगु अनुलोम बिलोमं जिमि प्याचाःगु लनी ला? छिगु कपालभातीं जिपिं लँय् सकुसल वारपार जुइ दइ ला? स्वामीजी ! जिपिं छिगु लिसःया प्रतिक्षाय् ।

देशय् थौं मार्क्सवादी सरकार वःगु दु। लः त्वनेमखनाः जनता गनावंगु दु। लँजुवाःत वारीं पारी वने मफयाः कय्कुनाच्वंगु दु। तीव्र तनावय् म्वाये मालाच्वंगु दु। शक्ति प्राप्ति जक न्हूगु सरकारया आजु मजुइमा। मार्क्सया जनपक्षीय दर्शन रणनीति जक मजुसे कार्यनीति नं जुइमाः। जनताया थौं आग्रह जुइ ।

More Stories Like this