गोर्खाल्याण्ड आन्दोलनय् स्वम्ह सित
सिलिगुढी, दार्जिलिङ लगायतया क्षेत्रय् गोर्खा जनमुक्ति मोर्चाया शान्तिपूर्ण आन्दोलनय् प्रहरीया गोलीं मोर्चाया स्वम्ह समर्थकत सीगु दु । सीपिं महिला नारी मोर्चाया निम्ह कार्यकर्ता व युवा मोर्चाया छम्ह कार्यकर्ता जूगु मोर्चां जानकारी ब्यूगु दु ।
मोर्चाया प्रचार छ्याञ्जे हर्क क्षेत्रीं प्रहरीया गोली अप्वःसित लाःगु हुनिं सीपिनिगु ल्याः अप्वयेफूगु जानकारी बियादीगु दु । बंगाल सरकारं छुं दिंनिसें डुबर्स मोर्चाया आन्दोलन दमन यायेत केन्द्रीय अर्ध सैनिक बल (सीआरपीएफ) परिचालन याःगु दु । मोर्चां आन्दोलनया ज्याझ्वः डुबर्स केन्द्रीत यायेवं केन्द्रीय अर्धसैनिक बल उखेपाखे छ्वःगु खः ।
डुबर्स नेपालीभाषी बाहुल क्षेत्र सिप्सु कुमानी धइगु थासय् प्रहरीं लाःलाःथे गोली कयेकाः स्वम्ह मनूत सीगु सिलिगुढीया सञ्चार माध्यमपाखें न्ह्यथंगु दु । प्रहरीया गोली लानाः सीपिनिगु नां सीमदुनिगु जानकारी ब्यूगु दु । प्रहरीं डुबर्स मालबजार, सिप्सु लगायतया लागाय् छुं दिंनिसें संविधानया धारा १४४ छ्यलेवं पुचः दयेका न्यासिवनेगुलिइ नापं पंगः थंगु दु । सोमबाः नारी मोर्चाया शान्तिपूर्ण आन्दोलनय् प्रहरीं हस्तक्षेप याःबलय् थ्यंमथ्यं निगू दर्जन स्वयाः आपालं घाःपाः जूगु खः ।
थ्वहे दथुइ उगु गोलीकाण्डया विरोधय् दार्जिलिङया थीथी थासय् हिंसा तच्वःगु जानकारी ब्यूगु खः । खर्साङय् दार्जिलिङ जिल्ला प्रशासनया गाडी आन्दोलनकारीं च्याकाः ध्वस्त याःगु खः ।
