'शिक्षा नीति कमजोर जूगुलिं सरकारी विद्यालयया अवस्था दयनीय '
एकीकृत नेकपा (माओवादी)या पोलिटब्युरो दुजः लिसे नेवाः राज्य समितिया इन्चार्ज हितमान शाक्यं राज्यया शिक्षा नीति कमजोर जूगुलिं सरकारी विद्यालयया अवस्था दयनीय जूगु बिचाः प्वंकादीगु दु । थौं सिद्धेश्वर माध्यमिक विद्यालय येँया सफूकुथि उलेज्या ज्याझ्वलय् न्वंवानादिसें शाक्यं नेपाःया राजनीतिक व्यवस्था पाय्छि मजूगुलिं जनताया म्हगस पूमवंगु धयादिल ।
थुकथं हे केएमसी विद्यालयया प्रधानाध्यापक किशोर गौतमं लगनशीलता धैर्य व मेहनत दुसा सरकारी विद्यालय निजी विद्यालय स्वयाः म्हो मजुइगु धयादिल । विद्यालय निरीक्षक शरद कुमार भण्डारीं च्यय्गू प्रतिशत मिसा मस्त व मिजं मस्त सरकारी विद्यालयसं ब्वनीगु जूगुलिं उमिगु उज्वल भविष्यया नितिं शिक्षा क्षेत्रय् न्ह्यज्यानाच्वंपिं मनूतय्सं धिसिलाक्क न्हृयःने न्ह्यायेमाःगु बिचाः प्वंकादीगु ख: ।
ज्याझ्वलय् ब्वति का:पिंसं सफूकुथिया निंतिं धेबा लिसे सफू ग्वाहालि यायेगु नापं बचं बियादीगु दु । नेता शाक्यं झिगू तगिंया ब्वनामिपिंत क्यालकुलेटर व च्वसा: ज्वलं इनाः दीगु खःसा थीथी मनूतय्सं नं सफूकुथिया नितिं धेबा लिसे सफू बियाः ग्वाहालि यानादीगु खः ।
