माओवादी व एमालेया गठबन्धन प्रति पौडेल आक्रोशित
नेपाली कांग्रेस संसदीय दलया नेता रामचन्द्र पौडेलं एमाले नायः झलनाथ खनाल नेतृत्वया सरकार यक्वः दिं च्वनेमफइगु खँ धयादीगु दु ।
गृह जिल्ला तनहुँया भिमाद गां कार्यसमितिया कार्यकर्तापाखें ग्वसाः ग्वःगु ज्याझ्वलय् न्वंवानादिसें नेता पौडेलं माओवादी व एमालेया गठबन्धन स्वार्थपूर्ण जूगु द्वपं बियादीगु दु । वय्कलं स्वार्थलिसे दयेकूगु खनाल नेतृत्वया सरकार मन्त्री ल्ययेगु प्रक्रियाय् हे थानाच्वंगु दाबी यानादिसें थुकियात लोकतन्त्रया हे उपहासयारुपं कुंखिनादीगु खः ।
एमालें माओवादीयात तिबः बिइगु लोकतान्त्रिक पद्धतिया हे उपहास जूगु द्वपं बियादीम्ह पौडेलं ल्वाभः मत्वःतूगुलिं माओवादी नागरिक पार्टी मजूनीगु बिचाः प्वंकादिल । माओवादीया ग्वाहालि व समर्थन काःगुलिं एमालेया ढुलमुले चरित्र प्रष्ट जूगु दाबी यानादिसें वय्कलं प्रधानमन्त्री जूगु खुन्हु दयेधुंकाः नं मन्त्रालयया भागबण्डाय् खँ क्वःजिइमफूगु दुःखया झाका जूगु धयादिल।
माओवादीइ ल्वाभः मोह व एमालेय् सत्तामोह दत्तले देशय् न्हूगु संविधान दयेके मफइगु पौडेलया धापू खः । माओवादी व एमालेदथुइ जूगु न्हय्गू बुँदे सहमति देय्या नितिं धोका जूगुलिं कांग्रेसयात मान्य मजुइगु पौडेलया दाबी दु ।
