माओवादी नेतृत्वया सरकार कांग्रेसयात अस्वीकार्य
नेपाली कांग्रेसयात न्हूगु सरकारया नेतृत्व माओवादीं यासाः अस्वीकार्य जुइगु निर्णय याःगु दु । कांग्रेसं माओवादीया पलेसाः आः न्हूगु सरकारया नेतृत्व एमालें यासाः सरकारय् ब्वति कायेगु निर्णय नं याःगु दु ।
बिहिवाः कांग्रेस संविधानसभा दलया बैठकं नेपाली कांग्रेसं एमालेया नेतृत्वय् सरकार गठन जुसाः सरकारय् ब्वति कायेगु निर्णय याःगु खः । बैठकय् न्हूगु सरकार एमालेया नेतृत्वय् गठन याना: सहमतिया आधारय् माओवादीयात नं सरकारय् ब्वति यायेमाःगु निर्णय यासें सहमतिया राजनीतिया विकल्प मदुगु ठहर याःगु दु ।
सिंहदरवारय् च्वंगु संविधानसभाया ज्याकूथी जूगु बैठकय् राष्ट्रपतिया पलाःयात स्वीकार यासें प्रधानमन्त्री प्रचण्डं प्रधानसेनापतियात कारवाही यानाः नागरिक सर्वोच्चता कायम यायेत मखसें थःगु कार्यकताया सर्वोच्चता कायम यायेत स्वःगु द्वपं ब्यूसें दक्वःसितं थ्व पलाःयात असफल यायेत इनाप याःगु दु ।
अथेहे छुं दिं न्ह्यः माओवादी अध्यक्ष प्रचण्डया सार्वजनिक जूगु भिडियो टेपय् न्ह्यथंनातःगु खँ प्रति कांग्रेस संसदीय दलया ध्यानाकर्षण जूगु खँ प्रमुख सचेतक लक्ष्मण घिमिरें धयादिल ।
