एमाले व माओवादी दथुइया बैठक लिच्वः विहीन
न्ह्यगू बुँदे सहमति कार्यान्वयन व सरकारय् मन्त्रालय बाँडफाँडया विषय क्वःछीत च्वंगु एकीकृत नेकपा (माओवादी) व नेकपा (एमाले) बैठक लिच्वः बिहीन जूगु दु । प्रधानमन्त्री निवास बालुवाटारय् थौं च्वंगु निगू दलया शीर्ष नेतापिनिगु बैठक हाकनं सहलह यायेगु सहमतिलिसे क्वचाःगु खः ।
न्ह्यगू बुँदे सहमतियात अक्षरसः पालना यायेमाःगु खँय् माओवादीं ब: बीगु व उकिइ पार्टी दुने सहलह यायेमाःगु एमालेया प्रतिक्रियालिपा थौंया वैठकं पूर्णता कायेमफूगु खः । न्ह्यगू बुँदे सहमतिया हे धरातलय् न्हुया झलनाथ खनाल प्रधानमन्त्री जुइत ताःलाःगु धासें माओवादी नेतापिंसं न्ह्यगू बुँदे सहमतिया मर्म परिमार्जन यायेमफइगु स्पष्ट याःगु दु ।
तर एमालें धाःसा पार्टी दुने सहलहलिपा जक क्वःछीफइगु जानकारी ब्यूगु दु । थ्व स्वयाः न्ह्यः एमालेया स्थायी समिति बैठकं न्ह्यगू बुँदे सहमतिइ छ्यःगु भाषा परिमार्जन यायेगु निर्णय याःगु खः ।
निगूलिं दलत दथुइया सहलह माओवादीया स्थायी समिति बैठकलिपा हाकनं च्वनीगु जानकारी ब्यूगु खः । निगू दलत दथुइ सहमति कार्यान्वयन जुइमफयाः प्रधानमन्त्री ल्यःगु छवाः बिइधुंकाः नं मन्त्रीमण्डल नीस्वने फूगु मदुनि ।
