माओवादी लिउनेया लुखां सत्ताय् थ्यन: भारत
येँ (सन्ध्या टाइम्स)/न्हू नियुक्त जुयादीम्ह प्रधानमन्त्री झलनाथ खनालं म्हिगः चीधंगु मन्त्रिमण्डल तकं गठन याये मफयेवं उकियात कयाः भारतीय संचार माध्यमतय्सं 'कमजोर सरकार' जूगु कारण अथे जूगु खः धकाः टिप्पणी याना हःगु दु ।
'टाइम्स अफ इण्डिया' या अनलाइन संस्करणय् थ्व टिप्पणी यानातःगु खः। सरकारय् माओवादी हावी जूगु कारणं प्रधानमन्त्री झलनाथ खनालं चीधंगु आकारया मन्त्रिमण्डल तकं गठन याये मफुगु खः धकाः उकी धयातःगु दु ।
उगु पत्रिकां माओवादीयात सत्ताय् मछ्वयेगु लागिं भारतं कुतः याःगु खःसां आखिरय् माओवादी लिउनेया लुखां जूसां सत्ताय् थ्यंकां तुं त्वःतूगु खँ नं धयातःगु दु ।
एमाले अध्यक्ष झलनाथ खनालयात प्रधानमन्त्री दयेकाः माओवादी हानं सत्ताय् थ्यंगु खँ उकी धयातःगु दु। थ्व स्वयां न्ह्यः माओवादीयात सत्ताय् मथ्यंकेगु लागिं भारतं अनेक कथंया भूमिका म्हिता वयाच्वंगु खः ।
उगु पत्रिकां प्रधानमन्त्री झलनाथ खनाल प्रधानमन्त्री जुइवं देशय् १४ घण्टा लोडशेडिङ्ग शुरु जूगु धकाः नं टिप्पणी यानातःगु दु। देशय् थनिंनिसें लोडशेडिङ्गया ई थपे यानाः न्हिं १४ घण्टा मत स्यायेगु याना हःगु खः ।
