सहमति कार्यान्वयन यायेत एमालेयात माओवादीया ख्याच्वः
एकीकृत नेकपा (माओवादीं) निगू दल दथुइ जूगु सहमति कार्यान्वयन मयासाः माओवादी सरकारय् मवनीगु ख्याच्वः बिउगु दु ।
रिपोटर्स क्लबं थौं येँय् याःगु छगू साक्षात्कार ज्याझ्वलय् माओवादी स्थायी समिति दुजः देव गुरुङं एमालें न्हय्गू बुँदे सहमतियात कार्यान्वयन यायेगु प्रतिबद्धता मयसाः निगू दल दथुइया सहकार्य त्वाःथलेगु ख्याच्वः बियादिल ।
एमालेया नेतृत्व पाखें न्हय्गू बुँदे सहमतिया बारे थःगु हे कथं व्याख्या यायेगु सुरु यानाहःगु प्रति सशंकित जूगु माओवादीं सहमति कथं ज्या मजूसाः थःपिं सरकारं पिने च्वनाः हे सरकारयात समर्थन यायेगु धाःगु दु ।
नेता गुरुङं मन्त्रिमण्डल गठनया बारे माओवादी व एमालेया नेतात दुथ्याःगु मंकाः कार्यदलं ज्या यानाच्वंगु इलय् एमाले स्थायी समितिं मन्त्रालय हे क्वःछिना नेतातय् नां सार्वजनिक यायेगु प्रति आपत्ति प्वंकादिल । वय्कलं माओवादीयात गृह मन्त्रालय बीगु सहमति प्रधानमन्त्री खनाल नाप जूगु दावी नं यानादिल ।
