प्रचण्ड-कोइराला दथुइ सहलह
देशय् जुयाच्वंगु राजनीतिक संकट अन्त्यया निंतिं प्रधानमन्त्री पुष्पकमल दाहाल प्रचण्डं कांग्रेस सभापति गिरिजाप्रसाद कोइरालानाप सहलह यानादीगु दु ।
कोइराला निवास महाराजगंजय् वनाः सहलह यानादिम्ह प्रचण्डं नागरिक सर्वोच्चता विपरित राष्ट्रपतिं ल्ह्वंगु पलाः छुं नं हालतं लितः कायेमाःगु अडान तयादिल । वयेकलं राष्ट्रपतिं पलाः भिंकेधुंकाः तिनि न्हूगु ढंगया सहमति याना: न्ह्याः वनेफइगु खँ धयादिल ।
सहलहया झ्वलय् प्रधानमन्त्री प्रचण्डं नागरिक सर्वोच्चताया पक्षय् च्वनाः राष्ट्रपतिया पलाः भिंकेत ग्वहालि यायेत कोइरालायात इनाप यानादिल ।
कांग्रेस सभापति कोइरालां राजनीतिक संकट समाधानया निंतिं लचकता क्यनां सहमतिया साथ न्ह्या वनेत प्रचण्डयात इनाप यानादीगु खः । सहलहलय् एमालेया नेतृत्वय् दक्वं मिलेजुया सरकार गठन यायेत कांग्रेसं प्रस्ताव तःगु तर माओवादी अध्यक्षं थुके बारे बीचाः याये धकाः लिसः बियादीगु खः । तर वयेकलं सहलहयात निरन्तरता बियाच्वनेगुलि धासाः सहमति प्वंकादिल ।
