पत्रकार महासंघ मिर्मिरे शाखाय् न्यौपाने नापं फुक्कं निर्विरोध
नेपाल पत्रकार महासंघ प्रतिष्ठान शाखा अन्तर्गत रेडियो मिर्मिरेया न्हापांगु अधिवेशनं श्रीधर न्यौपानेया नायःसुइ न्हूगु कार्यसमिति ल्यःगु दु । अनामनगरस्थित जनसञ्चार अभियानया सभाहलय् जूगु निर्वाचनं कार्यसमितिया फुक्क दुजःपिं निर्विरोध निर्वाचित जूगु खः ।
गुम्ह दुजः दुगु कार्यसमितिया न्वकुलय् विनोद घिमिरे, छ्याञ्जे रामकृष्ण शर्मा, ल्यू छ्याञ्जे मनोज अर्याल व दाँभरिइ सन्चु ब्लोन जुयादीगु खः । अथेहे दुजलय् सन्तु श्रेष्ठ, गोपाल नेपाल, तुलसी सापकोटा व दिनेश शिल्पकार निर्वाचित जुयादीगु खः ।
प्रतिष्ठानया निर्वाचनं महासंघया स्वम्ह सभासद् नं निर्विरोध निर्वाचित जूगु दु । सभासदय् विष्णु सापकोटा, पुष्प न्यौपाने व बासुदेव शर्मा 'बबिन' निर्विरोध जुयादीगु खः ।
उखे जनदिशा न्हिपौ शाखाया न्हापांगु अधिवेशनं सन्तोष पौडेलया नायःसुइ झिंछम्ह दुजः दुगु न्हूगु कार्यसमिति निर्विरोध निर्वाचित जूगु दु । स्वनिगःया फुक्क पीगू प्रतिष्ठान शाखाय् थौं हे न्हूगु कार्यसमिति ल्यःगु खः ।
'शान्ति व संविधान, नेपाल पत्रकार महासंघया अभियान' धइगु मू नारालिसे महासंघं थुगु दँ क्षेत्रगत रुपं अधिवेशन यायेत्यंगु दु । मध्यपश्चिमाञ्चलय् माघ २७ गते, पूर्वाञ्चलय् फागुन १ गते, मध्यमाञ्चलय् ४ गते, पश्चिमाञ्चलय् ७ गते, सुदूर पश्चिमाञ्चलय् १० गते व येँ, यल व ख्वपय् फागुन १३ गते अधिवेशन जुइत्यंगु खः । महासंघया केन्द्रीय महाधिवेशन धाःसा वइगु बैशाख २० व २१ गते जुइ ।
