खनाल पाखें सपथ ग्रहण, मन्त्रिमण्डल गठन यायेत असफल
न्हूम्ह प्रधानमन्त्री झलनाथ खनालं थौं प्रधानमन्त्रीया सपथ ग्रहण यानादीगु दु । राष्ट्रपतिया ज्याकू शितल निवासय् राष्ट्रपति डा. रामवरण यादवं प्रधानमन्त्री खनालयात पद तथा गोपनियताया सपथ ग्रहण याकादीगु खः ।
प्रधानमन्त्री खनालं सपथ कयादीगु इलय् उपराष्ट्रपति परमानन्द झा, प्रधानन्यायाधीश रामप्रसाद श्रेष्ठ, सभामुख सुभाषचन्द्र नेम्वाङ, माओवादी नायः पुष्पकमल दाहाल 'प्रचण्ड', कांग्रेस सभापति सुशील कोइरला लगायतया उपस्थिति दुगु खः ।
थौं हे प्रधानमन्त्री खनालं चिधंगु मन्त्रिमण्डल गठन यायेगु धाःसां असफल जुयादीगु दु । माओवादी व एमाले दथुइ मन्त्रालय भागबन्दा मिलेमजुइवं मन्त्रिमण्डल गठन यायेमफुगु खँ सीदुगु दु । माओवादीं थःपिंत गृह मन्त्रालय बीगु सहमति न्हापा हे जूगु तर आः वयाः एमालें गृहलय् थःगु हे मन्त्री छ्वयेगु तयारी याःगु धासें असहमति प्वंकेवं सरकार निर्माण जुइमफुगु खः । थुकिया बारे प्रधानमन्त्री खनाल व माओवादी नायः प्रचण्ड दथुइ कन्हय् सहलह जुइगु जूगु दु ।
