न्हूम्ह प्रम खनालया सुविधा व हाथ्या

एमालेया अध्यक्ष झलनाथ खनाल प्रधानमन्त्री नियुक्तिया नापनापं देशय् वामपन्थी एकताया छगू संयोग नं चूलाःगु दु। संसदया दकलय् तःधंगु वामपन्थी पार्टीत जक मखु, न्हापा वामपन्थी हे खयां नं लिपा थीथी पार्टीइ आवद्ध जूवंपिं उपेन्द्र यादव, महेन्द्र राय थेंज्याःपिं नेतात नं आः थ्वहे गठबन्धनय् समावेश जूवःगु कारणं थुकिं छगू अजूचायापुगु संयोग निर्माण जुया बिउगु दु। न्हूम्ह प्रधानमन्त्री झलनाथ खनालं थ्व संयोगयात सही ढंगं प्रयोग याये सल धाःसा थुकिं छगू बांलाःगु लिच्वः पिहां वइगु खँय् शंका मदु ।

भाजु झलनाथ खनाल थःगु पार्टी एमालेया शक्तिशाली अध्यक्ष खः। अले वय्कःया सरकारयात संसदया छगू शक्तिशाली पार्टीं समर्थन बियाच्वंगु दु। थ्व ल्याखं वय्कः थ्व इलय् देय्याम्ह हे छम्ह शक्तिशाली व्यक्तित्व जुयादीगु दु। थ्व वय्कःया निंतिं बांलाःगु पक्ष खः। तर थौं देय् गुगु संकटया अवस्थां न्ह्याः वनाच्वंगु खः, थ्व धाःसा वय्कःया निंतिं छगू हाथ्या नं खः। वय्कलं थःगु पक्षय् निर्माण जुयाच्वंगु थ्व शक्तियात देय्या थ्व संकट समाधान यायेगु ज्याय् प्रयोग याये फयेकेमाः। संसद दुने पिनेया शक्तिपाखें वय्कःयात समर्थन वःसां स्वयम् थःगु हे पार्टी दुनें धाःसा वय्कःया थीथी कथंया चुनौतीत वइगु सम्भावना दु। छाय्धाःसां वय्कःयात थःगु हे पार्टीया नेता माधव नेपालया सरकार क्वःथलाः थः प्रधानमन्त्री जूवःम्ह धइगु द्वपं दु। संविधान दयेकेत माओवादीया साथ मकासें मगाः धइगु वय्कःया मान्यता खःसां थ्व ज्याय् कांग्रेसया नं साथ माः धइगु खँयात धाःसा वय्कलं नजरअन्दाज यानादीगु दु। लक्ष्यय् थ्यंकेत थुपिं हाथ्यात वय्कलं पार यायेमाःगु खनेदु ।