कांग्रेस प्रतिपक्षय् च्वनीगु

एकीकृत नेकपा (माओवादी) व नेकपा (एमाले) दथुइ न्हय्गु बुँदे सहमति लिपाः गठन जूगु झलनाथ खनाल नेतृत्वया सरकारय् नेपालीं कांग्रेसं ब्वति मकायेगु निर्णय याःगु दु ।

कांग्रेसया थौं च्वंगु केन्द्रीय कार्यसमितिया मुँज्यां माओवादी व एमाले दथुइ जूगु सहमतिं शान्ति सम्झौताया उल्लंघन याःगु ठहर यासें उगु सहमति प्रति आपत्ति प्वंकूगु दु । मुँज्यां कांग्रेस प्रतिपक्षय् च्वनाः शान्ति व संविधान निर्माणय् सिर्जनात्मक ग्वाहालि यायेगु धाःगु दु ।

खनाल नेतृत्वया सरकारं याइगु ज्या व लागू याइगु नीति स्वयाः कांग्रेसं समर्थन यायेगु व विरोध यायेगु नीति क्वःछीगु निर्णय नं मुँज्यां याःगु दु ।