एमालेया स्वम्ह मन्त्री क्वःछित
नेकपा (एमालें) सरकारय् ब्वति काइपिं स्वम्ह नेतातय्गु नां क्वःछ्यूगु दु । पार्टी मू ज्याकू बल्खुइ थौं च्वंगु स्थायी समिति बैठकं छ्याञ्जे विष्णु पौडलं, स्थायी समिति दुजः भरतमोहन अधिकारी व पोलिटव्युरो दुजः गंगालाल तुलाधरयात मन्त्रीपरिषदय् छ्वयेगु निर्णय याःगु खः । छ्याञ्जे युवराज ज्ञवालीं वय्कःपिनिगु जिम्मेवारी माओवादीलिसे सहलह यानाः क्वःछीगु जानकारी ब्यूगु खः ।
एमालें प्रधानमन्त्री झलनाथ खनाल नेतृत्वया वर्तमान सरकारय् ब्वति कायेत फुक्क दलतय्त इनाप नं याःगु दु । स्थायी समिति बैठकं नेपाली कांग्रेस, मधेसवादी लगायतया दलतय्त सरकारय् ब्वति कायेत औपचारिक इनाप याःगु खः । वर्तमान सरकारयात हे राष्ट्रिय सहमतिया सरकारया रुप बिइमाःगु एमालें जानकारी ब्यूगु दु । एमालें सरकारय् ब्वति कायेत फुक्क दलयात इनाप याना दलतलिसे सहलह यायेत बरिष्ठ नेता केपी शर्मा ओलीयात जिम्मा ब्यूगु दु ।
