न्हूगु सरकारं शान्तिप्रक्रिया पूवंकीगु राष्ट्रसंघया विश्वास
येँ (सन्ध्या टाइम्स)/न्हूगु सरकार दयेकेगु नितिं ताः ई न्ह्यवंनिसें ब्वलनाच्वंगु अन्यौलया दथुइ म्हिगः एमाले अध्यक्ष झलनाथ खनाल प्रधानमन्त्रीइ निर्वाचित जुयादीवं हे संयुक्त राष्ट्रसंघं खनालयात बधाई बिउगु दु ।
संयुक्त राष्ट्र संघं एमाले अध्यक्ष झलनाथ खनाल प्रधानमन्त्रीइ निर्वाचन जुइवं आः न्हूगु सरकार गठन नापनापं नेपाःया शान्ति प्रक्रिया याकनं पूवंकी धकाः विश्वास याःगु दु। न्हूगु सरकार विस्तृत शान्ति सम्झौताया प्रतिबद्धता, सेना समायोजन नापं पुनःस्थापना, नेपाली सेनाया लोकतान्त्रीकरण थेंज्याःगु ज्या पूवंकेत सक्षम जुइ धकाः तकं राष्ट्रसंघं विश्वास याःगु दु। प्रधानमन्त्रीइ म्हिगः बहनी जक व्यवस्थापिका संसदय् निर्वाचित जुयादीम्ह एमालेया अध्यक्ष झलनाथ खनालयात बधाई व भिंतुना सन्देश बीगु झ्वलय् संयुक्त राष्ट्रसंघया महासचिव वान की मुनं अथे विश्वास यानादीगु खः। महासचिव मुनं नेपालय् ताः ई न्ह्यवंनिसें राजनीतिक गतिरोध जुयाच्वंगु खँ न्ह्यथँसें आःया इलय् नेपाःमि जनताया भावनायात थुइकाः न्हूगु सरकार दयेकत सफल जूगुलिं नेपाःया राजनीतिक दलत नापनापं दलया नेतातय्त तकं बधाई बियादीगु दु। अथे हे नेपाःया शान्ति प्रक्रिया व न्हूगु संविधान निर्माणया ज्या याकनं पूवनेमाः धकाः राष्ट्रसंघं न्ह्यथंगु दु ।
