एमालें बृहत्तर सरकार गठन यायेत पहल याइगु

थःगु पार्टीया नायः झलनाथ खनाल प्रधानमन्त्री पदय् निर्वाचित जुइवं नेकपा (एमालें) बृहत्तर सरकार गठनया निंतिं पहल याइगु जूगु दु ।

खनाल प्रधानमन्त्री ल्यःगु कन्हय् कुन्हु च्वंगु एमाले स्थायी समितिया मुँज्यां शान्ति व संविधानया कार्यभारयात प्रमुखता ब्यूसें उकियात लिच्वःलय् थ्यंकेत बृहत्तर सरकार गठनया निंतिं पहल यायेगु निर्णय याःगु दु । नापं एमालें अज्याःगु सरकार गठनया निंतिं ग्वहालि यायेत मेमेगू दलतय् इनाप नं याःगु दु ।

पार्टी मू ज्याकू बल्खुइ च्वंगु मुँज्यां म्हिगया निर्वाचनय् खनालया पक्षय् मतदान याःपिं फुक्कसित सुभाय् नं ब्यूगु दु । मुँज्याय् पार्टीया वरिष्ठ नेता केपी शर्मा ओली व विद्या भण्डारी धाःसा उपस्थित जुयामदी ।