फोरम बाहेक स्वंगू मधेशवादी दल सरकारय् मवनीगु

थःपिनिगु मुद्दा सम्बोधन जूसाः सरकारय् वनेफइ : फोरम

मधेशी जनअधिकार फोरम बाहेक संयुक्त मधेशी मोर्चाय् आवद्ध स्वंगू दल सरकारय् मवनीगु जूगु दु ।

शुक्रवाः सद्भावना पार्टीया ज्याकूथी च्वंगु मोर्चाया मुँज्यां थःपिं सरकारय् मवसें सकारात्मक प्रतिपक्षय् च्वनेगु धाःगु दु । अथे निर्णय याःगु दलय् मधेशी जनअधिकार फोरम (लोकतान्त्रिक), तराई मधेश लोकतान्त्रिक पार्टी व सद्भावना पार्टी दु ।

उखे म्हिगया निर्वाचन बहिष्कार याःगु फोरम नेपालं धाःसा थःपिनिगु मुद्दा सम्बोधन जूसाः सरकारय् वनेफइगु धाःगु दु । थौं येँय् जूगु छगू साक्षात्कार ज्याझ्वलय् फोरम नायः उपेन्द्र यादवं संविधान निर्माण शान्ति प्रक्रिया व मधेशया मुद्दा सम्बोधन जुइगु सुनिश्चित जूसाः सरकारय् ब्वति कायेगु धयादीगु खः ।