खनाल नेपाःया ३४क्वःम्ह प्रधानमन्त्री
नेकपा (एमाले)या नायः झलनाथ खनालं नेपाःया ३४क्वःम्ह प्रधानमन्त्री जुयादीगु दु । व्यवस्थापिका संसदय् ३६८ मत हयाः खनाल नेपाःया न्हूम्ह प्रधानमन्त्री जुइत ताः लानादीगु दु । वंगु असार १६ गते माधवकुमार नेपालं राजनीमा बीधुंकाः ताः ई तक प्रधानमन्त्री ल्यय् मफयाच्वंगु इलया अन्ततः क्वचायेकाः नेपालया हे पार्टीया नायः न्हूगु प्रधानन्त्री जूगु दु ।
इलामया साँखेजुङय् २००६साल चैत ३ गते जन्म जुयादीम्ह खनाल नेपाःया प्यम्ह कम्युनिष्ट प्रधानमन्त्री खः । वय्कः स्वयां न्ह्यः एमालेया तत्कालीन मू छ्याञ्जे मनमोहन अधिकारी, एनेकपा (माओवादी)या नायः पुष्पकमल दाहाल 'प्रचण्ड' व एमालेया वरिष्ठ नेता माधवकुमार नेपाल प्रधानमन्त्री जुयादीधुंकूगु दु ।
विद्यार्थी इलं निसें हे राजनीतिलय् सक्रिया जुयादीम्ह खनालं २०२५ सालं निसें नेपाल कम्युनिष्ट पार्टीया दुजः जुयाः पार्टीगत राजनीति सुरु यानादीगु खः ।
२०४६सालया अन्तरिम सरकारय् कृषि मन्त्री जुयादीम्ह खनाल वयां लिपा मनमोहन अधिकारीया नेतृत्वय् गठन जूगु सरकारय् संचार मन्त्री जुयादीगु खः ।
२०३९सालय् तत्कालीन मालेया मू छ्याञ्जे जुयादीम्ह खनाल २०४६सालय् जूगु मालेया प्यक्वःगु तःमुँज्या लिपा नेतृत्व कयादीगु खः । २०५२साल लिपा नेतृत्वय् उली प्रभाव लाकेमफुम्ह खनाल २०६५सलाय् जूगु एमालेया तःमुँज्या पाखें नायः पदय् निर्वाचित जुयादीगु खः ।
