प्रचण्डयात बुकेत गच्छेदारया उम्मेदवारी
येँ (सन्ध्या टाइम्स)/एकीकृत माओवादीया प्रधानमन्त्रीया उम्मेदवार प्रचण्डयात बुकेगु नितिं मधेसी जनअधिकार फोरम लोकतान्त्रिकया अध्यक्ष विजयकुमार गच्छेदार नं उम्मेदवार जुयादीगु खयेमाः धकाः अनुमान यानाहःगु दु।
नियमावली संशोधन याये धुंकाः सुनां नं विपक्षय् मतदान याये मदुगु नाप नापं तटस्थ तकं च्वने मदुगु अवस्थाय् यदि गच्छेदार उम्मेदवार जुयामदीगु खःसा प्रचण्ड त्याइगु संभावना यक्व दुगु खः धकाः माओवादीया छम्ह नेतां धयादीगु दु ।
माओवादीया थःगु मत अले चिचीधंगु खुगू दलया मत दइगु प्रायः निश्चित जुइधुंकाः मधेशवादी दलत मध्ये मधेसी जनअधिकार फोरम व तराई मधेस लोकतान्त्रिक पार्टी नेपालं समर्थन याइगु अले मेपिं मधेसवादी छुं छुं सांसदतय्सं मत बीवं प्रचण्ड बहुमतं त्याइगु अवस्था दुगु जुयाः प्रचण्डयात बुकेगु निंतिं हे गच्छेदार उम्मेदवार जुयादीगु खः धाःगु दु ।
गच्छेदार उम्मेदवार जुयादी धुनेवं मधेसवादी दलतय्गु मत प्रचण्डयात मवनीगु जुयाः हे अथे वय्कःयात उम्मेदवारया रुपय् डिजाइन कथं हे थनेगु ज्या जूगु खः धकाः तकं धयाहःगु दु ।
यदि फोरम लोकतान्त्रिकया अध्यक्ष विजयकुमार गच्छेदार उम्मेदवार जुयामदीगु खःसा थौं जुइगु न्हापांगु चरणया चुनावय् प्रचण्ड जक त्याइगु संभावना दुगु अले कांग्रेसया उम्मेदवार रामचन्द्र पौडेल व एमालेया उम्मेदवार झलनाथ खनाल त्याइगु संभावना हे मदुगु जुयाः हे उकथंया खेल जूगु खः धकाः नं माओवादीया नेतां धयादीगु दु ।
