धादिङय् गोलीं कयेकाः घाःपाः
येँ (सन्ध्या टाइम्स)/धादिङया झार्लाङ गाविसय् वंगु चान्हय् म्हमसिउपिं मनूतय्सं गोलीं कयेका छम्ह मनूयात घाःपाः यानाः बिउगु दु। अनया कादुरीकाया ग्वाहालिइ संचालन जुयाच्वंगु खानेपानी योजनाया स्थानीय फिल्ड सुपरभाइजर सोनु सुनुवारयात द्यनाच्वंगु अवस्थाय् वंगु चान्हय् म्हमसिउपिं मनूतय्सं गोलीं कयेकाः तसकं घाःपाः यानाः बिउगु खः। नुगःपाय् व न्हकुइ गोलीं कयाः घाःपाः जूम्ह सुनुवारयात थौं सुथय् वासः यायेत हेलिकप्टरय् तयाः पोखराय् यंकूगु दु। अथे गोलीं कयेकाः घाःपाः यानाः वय्कःयाके दुगु खानेपानी योजनाया १ लाख तकासिबें अप्वः ध्यबा नं आक्रमणकारीतय्सं यंकूगु दु ।
