अशान्त इजिप्ट बुलुहुँ गृहयुद्धपाखे?

मध्य एशियाया तःधंगु देय् इजिप्ट थ्व इलय् विश्वयात हे वाराक्वारां संकी कथं अस्थिर जूगु दु। वंगु ३० दँ न्ह्यवंनिसें लगातार शासन याना वयाच्वंम्ह राष्ट्रपति होस्नी मुबारकं तुरुन्त हे गद्दी त्वःतेमाः धइगु माग यासें सतकय् कुहां वःपिं लखौं मनूतय् प्रदर्शनं यानाः इजिप्ट अशान्त जूवंगु दु। प्रदर्शनयात संवोधन याये कथं राष्ट्रपति मुबारकं थम्हं आः वइगु सेप्टेम्बरय् सत्ता त्वःतेगु धकाः घोषणा याःगु दुसा उकियात प्रदर्शनकारी जनतां स्वीकार मयासे आन्दोलन जारी हे यानातःगु दु। संवोधन धुंकाः नं आन्दोलन जारी यानाच्वन धकाः म्हिगः मुबारक पक्षीय कार्यकर्तात नं सतकय् कुहां वयाः आन्दोलनया प्रतिकार याः वःगु दुसा थुकिं यानाः निगू पक्षया दथुइ मेगु कथंया ल्वापु शुरु जूगु दु। थ्व न्हूगु ल्वापुयात इलय् हे पने मफुत धाःसा थुकिं इजिप्टयात गृहयुद्धय् यंकीगु खतरा दु ।

खतुं राष्ट्रपति मुबारक इज्जतसाथ शासन त्वःतेगु पक्षय् दु। उकिं वय्कलं सेप्टेम्बर तकया ई फ्वनाच्वंगु दु। तर वय्कलं सेप्टेम्बरय् शासन त्वःतेगु अनुमति दत धायेवं वय्कःया प्रतिष्ठा थहां वनीगु धाःसा मखु। जनतां राजीनामा माग यानाच्वंगु इलय् दथुइ हे पद त्वःता बिल धाःसा उकिं बरु वय्कःया प्रतिष्ठा थहां वनीगु खँयात ल्वःमंके मजिउ। आः ला जनतां तच्वयेका हःगु आन्दोलन खनाः वय्कःयात साथ बियाच्वंपिं पश्चिमा जगतं नं सत्ता त्वःतूसां जिउ धइगु सन्देश वय्कःयात बीधुंकूगु दु। सेना वय्कःया पक्षय् मदयेधुंकल। थज्याःगु अवस्थाय् नं सत्ताय् च्वनाच्वन धाःसा वय्कलं सत्ता जक मखु देय् हे त्वःतेमालीगु तकं अवस्था वयेफु। विश्वया आपालं तानाशाहत थुकथं हे पतन जूगु इतिहासपाखें शिक्षा कयाः वय्कलं पलाः छीमाः ।