माओवादीया समर्थन लिपा खनाल न्हूम्ह प्रधानमन्त्री
एकीकृत नेकपा माओवादीं एमालेयात समर्थन यायेवं देय्या न्हूम्ह प्रधानमन्त्रीलय् एमाले नायः झलनाथ खनाल निर्वाचित जुयादीगु दु । व्यवस्थापिका संसदय् ३६८ मत हयाः खनाल न्हूम्ह प्रधानमन्त्री जुयादीगु खः । वय्कलं नेपाली कांग्रेसया संसदीय दलया नेता रामचन्द्र पौडेल व मधेशी जनअधिकार फोरमयात नायः विजयकुमार गच्छदारयात ल्यूने लाकाः प्रधानमन्त्री निर्वाचनय् बहुमत प्राप्त यानादीगु खः । पौडेलं १२२ मत कयादीगु खःसा गच्छदारं ६७ जक
हयादीगु खः ।
वंगु असार १६ गते माधवकुमार नेपालं प्रधानमन्त्रीया पदं राजनीमा बियादीगु खः । न्हय्ला लिपा प्रधानमन्त्री ल्ययादीम्ह खनालयात माओवादी लगायत चिधंगु दलतय्सं समर्थन याःगु खः । मधेशी जनअधिकार फोरमं धाःसा थौंया निर्वाचन बहिष्कार याःगु खः ।
फोरमया थौं च्वंगु संसदीय दलया मुँज्याय् सुयागु पक्षय् मतदान यायेगु धकाः निर्णय यायेमफेवं निर्वाचन प्रक्रिया बहिष्कार याःगु खः । फोरमया नायः उपेन्द्र यादव माओवादीयात मतदान यायेगु पक्षय् दुगु खःसा सह नायः जयप्रकास जुप्ता कांग्रेसयात मतदान यायेगु पक्षय् दुगु खः ।
सुथय् तक थौंया प्रधानमन्त्रीया निर्वाचनय् प्यम्हं उम्मेदवार मत्याइगु सम्भावना प्रवल दुगु इलय् माओवादी स्थायी समितिया मुँज्यां खनालया पक्षय् मतदान यायेगु निर्णय यायेवं खनाल प्रधानमन्त्री जुइगु निश्चित जूगु खः । माओवादीया बहुमति स्थायी समिति दुजलं खनालयात समर्थन यायेगु निर्णय याःसां पार्टी न्वकू डा बाबुराम भट्टराई लगायतं उगु निर्णयलय् फरक मत तयाः नोट अफ डिसेन्ट च्वःगु खः ।
