थःथःगु पक्षय् मतदान यायेत नेतातय् लबिङ
व्यवस्थापिका संसदय् निर्वाचनय् जुइगु न्हि थौं नेतात थःथःगु पक्षय् मतदान यायेत लबिङ यायेगु ज्याय् व्यस्त जुयाच्वंगु दु ।
थ्वहे झ्वलय् प्रधानमन्त्रीया उम्मेदवारत माओवादी नायः पुष्पकमल दाहाल 'प्रचण्ड' व एमाले नायः झलनाथ खनाल दथुइ नापलाय् ज्या जूगु दु । वय्कःपिं निम्हेसिनं थःत ग्वाहालि यायेत इनाप याःगु खँ सीदुगु दु ।
माओवादी नायः प्रचण्ड निवास न्हू बजारय् जूगु खँल्हाबंलाय् प्रचण्डं न्हापांगु चरणय् थःगु पक्षय् एमालेयात मतदान यायेत इनाप यासें न्हापांगु चरणय् माओवादीया पक्षय् बहुमत मवसाः निगूगु चरणय् एमालेयात ग्वाहालि यायेगु आश्वासन बियादीगु खः ।
अथेहे थौं हे कांग्रेस पाखें प्रधानमन्त्रीया उम्मेदवार रामचन्द्र पौडेल व मधेशी जनअधिकार फोरम (लोकतान्त्रिक)या नायः विजयकुमार गच्छदारं नेकपिकया नायः नारायणमान विजुक्छेयात बिस्कं बिस्कं नापलाना थःया पक्षय् मतदान यायेत इनाप याःगु दु ।
पौडेलं शान्ति व लोकतन्त्रयात संस्थागत यायेत व इलय् हे संविधान निर्माण यायेत कांग्रेसया नेतृत्वय् सरकार गठन जुइमाःगु धासें थःगु पक्षय् मतदान यायेत इनाप याःगु खः । उखे गच्छदारं स्वम्ह नेतातय्तसं देय्यात अनिर्णयया बन्दी दयेकूगु धासें थःगु पक्षय् मतदान यायेत इनाप याःगु दु ।
नेमकिपा नायः विजुक्छें धाःसा पार्टी दुने सहलह यायेधुंकाः जक सुयात मतदान यायेगु बारे निर्णय यायेगु लिसः बियादीगु खः । न्याम्ह सभासद्त दुगु नेमकिपां थ्वस्वयां माओवादीया पक्षय् मतदान यानावयाच्वंगु खः ।
न्हूम्ह प्रधानमन्त्री ल्ययेगु निंतिं थौं १ बजे व्यवस्थापिका संसदय् निर्वाचन जुइत्यंगु दु ।
