प्रमया निंतिं प्रचण्ड, पौडेल, खनाल व गच्छदारया उम्मेदवारी
व्यवस्थापिका संसदय् कन्हय् जुइत्यंगु प्रधानमन्त्रीया निर्वाचनया उम्मेदवारया निंतिं प्यम्हेसिनं थःथःगु नां दर्ता याःगु दु । एनेकपा (माओवादी)या नायः पुष्पकमल दाहाल 'प्रचण्ड', नेपाली कांग्रेसया संसदीय दलया नेता रामचन्द्र पौडेल, नेकपा (एमाले)या नायः झलनाथ खनाल व मधेशी जनअधिकार फोरम (लोकतान्त्रिक)या नायः विजयकुमार गच्छदारं थःथःगु उम्मेदवारी दर्ता याकूगु दु ।
बुधवाः न्हिनय् स्वताः ई जुइ छुं ई न्ह्यः संसदीय सचिवालय् थ्यंकाः प्रचण्डं थःगु उम्मेदवारी दर्ता याकूगु खः । वय्कःया नां माओवादीया न्वकू डा. बाबुराम भट्टराईं प्रस्ताव यानादीगु खःसा मेम्ह न्वकू नारयणकाजी श्रेष्ठ समर्थकया कथं च्वनादीगु खः ।
अथेहे कांग्रेस महामन्त्री प्रकाशमान सिंह प्रस्तावक व नेता रामकृष्ण यादव समर्थकया कथं कांग्रेस पाखें रामचन्द्र पौडेलया नां दर्ता याकूगु खः ।
उखे दकलय् न्हापां संसदीय सचिवालय् थ्यंकाः एमाले नायः झलनाथ खनालया नां दर्ता जूगु खः । खनालया प्रस्तावकय् एमाले प्रमुख सचेतक भीम आचार्य व समर्थकय् रामचन्द्र झा दु ।
अथेहे वाम-लोकतान्त्रिक गठबन्धनयात निरन्तरता बीमाःगु धासें झिंन्हय्गू दलया समर्थनय् फोरम लोकतान्त्रिकया नायः विजयकुमार गच्छदारं नं थःगु नां दर्ता याःगु दु । गच्छदारया प्रस्तावकय् सद्भावना पार्टीया ल्यू नायः लक्ष्मणलाल कर्ण व समर्थकय् तराई मधेश लोकतान्त्रिक पार्टीया ल्यू महामन्त्री जितेन्द्र सोनल दी ।
प्रधानमन्त्रीया निंतिं कन्हय् न्हिनसिया १ बजे संसदय् चुनाव जुइत्यंगु दु । उम्मेदवारत प्रधानमन्त्रीया निंतिं निर्वाचित जुइत ३०१ मत आवश्यक जुइ । यदि कन्हय् सु नं उम्मेदवारं बहुमत खाके मफुसा २२ गते हानं प्यम्हे हे उम्मेदवारत दथुइ निर्वाचन जुइ । उगु निर्वाचन पाखें नं प्रधानमन्त्री ल्यये मफुसा अप्व मत हःपिं निम्ह दथुइ २३ गते निर्वाचन जुइ ।
