चिधंगु न्हय्गू दलं प्रचण्डयात मतदान याइगु

संविधानसभाय् दुथ्याःगु न्हय्गू चिधंगु दलतय्सं एकीकृत नेकपा (माओवादी)या नायः पुष्पकमल दाहाल 'प्रचण्ड'या पक्षय् मतदान याइगु जूगु दु ।

बुधवाः सुथय् माओवादी शीर्ष नेतातनापया खँल्हाबंला लिपा न्हय्गू दलं माओवादीयात मतदान यायेगु निर्णय याःगु खः । न्हय्गू दलं संविधानसभाय् दलतय् तःधंगु दल माओवादी जूगुलिं माओवादीया हे नेतृत्वय् सरकार गठन जुइमाःगु धासें मतदान यायेगु धाःगु खः ।

माओवादीया पक्षय् मतदान याइगु दलय् नेकपा (माले) समाजवादी, संघीय लोकतान्त्रिक राष्ट्रिय मञ्च, नेपाः राष्ट्रिय पार्टी, नेपाली जना दल, नेपाल सद्भावना पार्टी (आनन्दीदेवीं), राष्ट्रिय जनमुक्ति पार्टी व नेकपा एकीकृत दु ।